Yangi Zelandiyada 2-noyabrdan 15-noyabrga qadar “Yil qushi” nomi uchun onlayn ovoz berish jarayonlari bo‘lib o‘tmoqda. Biroq unga firibgarlar aralashuvi sabab dog‘dor kichkina kivi 1,5 mingdan ortiq ovoz to‘pladi, deb yozadi CNN. Qushcha biroz vaqt ro‘yxatning yuqori qismiga yaqinlashgan.
Bu kabi soxta ovozlarni saylovning rasmiy kuzatuvchilari payqab qolgan va shundan so‘ng ularni o‘chirib tashlagan. Ovoz berish jarayonining tashkillashtiruvchisi Lora Keounning so‘zlariga ko‘ra, ovozlar Oklenddagi bitta IP-manzilga bog‘langan soxta elektron pochta manzillari orqali yuborilgan. Kivining ovozlarini kim ko‘paytirib ko‘rsatishga uringani va bu ishni nima sababdan qilgani noma’lum.
“Omadimiz kelib ushbu kivi qo‘shimcha 1,5 mingta ovoz olishga uringanini fosh qildik. U bellashuvda g‘olib chiqish uchun boshqa qushlar kabi qoida bo‘yicha o‘ynashi kerak”, — deydi u. Uning aytishicha, qushcha Yangi Zelandiya aholisining qadriyatlarini — demokratiya, adolat, tenglik va haqiqatni anglatadi. “Yoqimtoy qushchamizga berilgan noqonuniy ovozlarni oqlamaymiz”, — deya qo‘shimcha qiladi Keoun.
“Yangi Zelandiyaning yil qushi” tanlovi 2005-yildan buyon o‘tkazib kelinadi. Uning tashkilotchisi Forest and Bird tashkiloti bo‘lib, bu orqali ular Yangi Zelandiya xalqini yovvoyi tabiatga yordam ko‘rsatishga ilhomlantirish niyatida. Hozirga qadar 35 ming kishi ovoz berishga ulgurgan. Hozircha toroa (Yangi Zelandiya albatrosi) va kakapo (uchmaydigan to‘tiqush) peshqadamlik qilmoqda. Bitta elektron manzil orqali bir marotaba ovoz berish mumkin, shuningdek, boshqa davlatlar aholisi ham bunda ishtirok eta oladi.
Kichkina kulrang kivi faqatgina Yangi Zelandiya va Kapiti orolchasida uchraydi, oldinlari Janubiy orol o‘rmonlarida ham yashagan. Bu kivining eng kichkina turi bo‘lib, bo‘yi 25 santimetrni, og‘irligi 1,3 kilogrammni tashkil etadi. U “Qizil kitob”ga kiritilgan.
Izoh (0)