Янги Зеландияда 2 ноябрдан 15 ноябрга қадар «Йил қуши» номи учун онлайн овоз бериш жараёнлари бўлиб ўтмоқда. Бироқ унга фирибгарлар аралашуви сабаб доғдор кичкина киви 1,5 мингдан ортиқ овоз тўплади, деб ёзади CNN. Қушча бироз вақт рўйхатнинг юқори қисмига яқинлашган.
Бу каби сохта овозларни сайловнинг расмий кузатувчилари пайқаб қолган ва шундан сўнг уларни ўчириб ташлаган. Овоз бериш жараёнининг ташкиллаштирувчиси Лора Кеоуннинг сўзларига кўра, овозлар Окленддаги битта IP-манзилга боғланган сохта электрон почта манзиллари орқали юборилган. Кивининг овозларини ким кўпайтириб кўрсатишга урингани ва бу ишни нима сабабдан қилгани номаълум.
«Омадимиз келиб ушбу киви қўшимча 1,5 мингта овоз олишга уринганини фош қилдик. У беллашувда ғолиб чиқиш учун бошқа қушлар каби қоида бўйича ўйнаши керак», — дейди у. Унинг айтишича, қушча Янги Зеландия аҳолисининг қадриятларини — демократия, адолат, тенглик ва ҳақиқатни англатади. «Ёқимтой қушчамизга берилган ноқонуний овозларни оқламаймиз», — дея қўшимча қилади Кеоун.
«Янги Зеландиянинг йил қуши» танлови 2005 йилдан буён ўтказиб келинади. Унинг ташкилотчиси Форест анд Бирд ташкилоти бўлиб, бу орқали улар Янги Зеландия халқини ёввойи табиатга ёрдам кўрсатишга илҳомлантириш ниятида. Ҳозирга қадар 35 минг киши овоз беришга улгурган. Ҳозирча тороа (Янги Зеландия албатроси) ва какапо (учмайдиган тўтиқуш) пешқадамлик қилмоқда. Битта электрон манзил орқали бир маротаба овоз бериш мумкин, шунингдек, бошқа давлатлар аҳолиси ҳам бунда иштирок эта олади.
Кичкина кул ранг киви фақатгина Янги Зеландия ва Капити оролчасида учрайди, олдинлари Жанубий орол ўрмонларида ҳам яшаган. Бу кивининг энг кичкина тури бўлиб, бўйи 25 сантиметрни, оғирлиги 1,3 килограммни ташкил этади. У «Қизил китоб»га киритилган.
Изоҳ (0)