Amerikaning Virjiniya shtatidagi Xoupuell shahrida yashovchi besh yashar qiz o‘zi tez yordam chaqirib, tibbiy yordamga muhtoj onasini hayotini saqlab qoldi. Bu haqda “11 WJHL” telekanalining sayti xabar beradi.
2020-yilning 8-noyabr kuni 39 yoshli Lashonasti Tarbervill 5 yashar qizalog‘i Devea Boksli bilan uyda yolg‘iz bo‘lgan. To‘satdan Tarbervill o‘zini yomon his qila boshlaydi. “Isitma kuchaydi, qattiq terladim va ko‘nglim ayniy boshladi. Boshim aylanganligi uchun yotib oldim”, − deydi Tarbervill.
Shu payt uning qizalog‘i onasiga nima bo‘layotganini ko‘rdi va uning ahvoli xavotir olarli darajada ekanligini sezdi. “U menga gapirganini eslayman: “Oyi, biror narsa deng”, − deydi Tarbervill. Ayolda na qimirlashga va na gapirishga kuch bor edi.
Shundan so‘ng Devea onasining telefonini topishga urindi. U telefonni olib, tez tibbiy yordamga qo‘ng‘iroq qildi va dispetcherlarga vaziyatni tushuntirishga muvaffaq bo‘ldi.
Shifokorlar kelguniga qadar qiz onasiga suv keltirdi va uning boshini silab o‘tirdi. Chaqiruv bo‘yicha kelgan tibbiyot xodimlari Tarbervillni tez yordam mashinasiga joylashtirib, mahalliy kasalxonaga olib ketdi.
Shifokorlarning ma’lum qilishicha, Tarbervillda gipoglikemik reaksiya yuz bergan. Uning qondagi qand miqdori xavf tug‘diradigan darajada pasayib ketgan. Shuningdek, ayolning hozirgi ahvoli ancha yaxshi.
“Devea – mening jajji qahramonim. U vaziyatdan esankirab qolmadi. O‘zini jiddiy tutdi va yig‘lamadi”, − deydi uning onasi. Ayolning so‘zlariga ko‘ra, Devea avvaldanoq tez tibbiy yordam chaqirishga o‘rgatilgan bo‘lishi mumkin, sababi u oldin buvisi bilan birga yashagan.
Izoh (0)