Italiyaning Sora shahrida joylashgan kasalxona xodimi adashib, o‘z palatasida tinchgina nonushta qilib o‘tirgan bemorning oilasiga uni koronavirusdan o‘ldi deya xabar berib yubordi. Bu haqda Wanted in Rome nashri ma’lum qildi.
Kech tushganida kasalxona xodimlari bemorlardan birining oilasiga qo‘ng‘iroq qilgan. “Otangiz vafot etdi, afsusdamiz”, — deya uning oilasiga hamdardlik bildirishgan.
Oila ushbu dahshatli xabarni eshitgan va bu haqda qolgan qarindosh hamda do‘stlarini xabardor qilgan. Italiyalikning qarindoshlari dafn marosimlarini tashkillashtirishga tushib ketgan. Ular dafn ishlari bilan shug‘ullanadigan agentga aloqaga chiqqan, ular esa shahar bo‘ylab nekrologli posterlarni yopishtirishni boshlab yuborgan.
Tushunmovchilik keyingi kuni, dafn byurosi tobutda yotgan marhumning suratini oilaga yuborganidan so‘ng aniqlangan. Koronavirus pandemiyasi sabab joriy etilgan cheklovlar oilaning bemor yotgan kasalxonaga borishiga to‘sqinlik qilgan, lekin uning tashqi ko‘rinishi bir necha kun ichida bunchalik o‘zgarib ketishi mumkin bo‘lmagan.
Qarindoshlar “marhum”ning belgisi — chandig‘i yo‘qligiga ishonch hosil qilgach, ularning gumoni tasdiqlangan. Keksa erkakning ayol va farzandlari kasalxonaga murojaat qilganidan so‘ng, u sog‘-omonligi va o‘z palatasi nonushta qilib o‘tirgani aniqlangan.
Avvalroq Namanganda koronavirusga chalingan tirik fuqaroning yaqinlariga uning o‘lgani haqida xabar berilgani ma’lum bo‘lgandi.
Izoh (0)