Xalq deputatlari Davlatobod tumani kengashining birinchi sessiyasi bo‘lib o‘tdi. Bu haqda “Daryo” muxbiri Azizbek Abduvaliyev xabar bermoqda.
Prezidentning joriy yil 26—27-iyun kunlari Namangan viloyatiga tashrifi davomida Namangan shahri tarkibida Davlatobod tumanini qayta tashkil etish yuzasidan taklif bildirilgandi. Mazkur masala xalq deputatlari Namangan shahar va viloyat kengashlari sessiyalarida ko‘rib chiqilib, davlat rahbarining tashabbusi ma’qullandi.
Oliy Majlis Senatining 2020-yil 11-sentabrdagi “Namangan viloyatining Namangan shahri tarkibida Davlatobod tumanini tashkil etish to‘g‘risida”gi qarori bilan yangi tumanga asos solindi.
Qayta tashkil etilgan Davlatobod tumani hududi 4686 gektarga teng bo‘lib, Namangan shahri hududining 26 foizini tashkil etadi. Tumanning 25 ta mahallasida 150 ming nafar aholi istiqomat qiladi.
Tuman hududida “Yuksalish” va “Orzu” kichik sanoat zonalari, “Navbahor” stadioni, “Afsonalar vodiysi” bog‘i, 5 ta zamonaviy mehmonxona joylashgan. Namangan City ham shu yerda barpo etiladi.
Sessiyada tashkiliy masala ko‘rildi. Shu paytga qadar viloyat hokimligining sanoatni rivojlantirish, kapital qurilish, kommunikatsiyalar va kommunal xo‘jalik masalalari kotibiyati mudiri etib ishlab kelgan Anvarjon Tojimirzayev Davlatobod tumani hokimi etib tayinlandi. Muhammadali Qirg‘izboyev tuman prokurori, Umid Boyxonov esa tuman IIB boshlig‘i lavozimini egalladi.
Izoh (0)