Халқ депутатлари Давлатобод тумани кенгашининг биринчи сессияси бўлиб ўтди. Бу ҳақда «Дарё» мухбири Азизбек Абдувалиев хабар бермоқда.
Президентнинг жорий йил 26—27 июнь кунлари Наманган вилоятига ташрифи давомида Наманган шаҳри таркибида Давлатобод туманини қайта ташкил этиш юзасидан таклиф билдирилганди. Мазкур масала халқ депутатлари Наманган шаҳар ва вилоят кенгашлари сессияларида кўриб чиқилиб, давлат раҳбарининг ташаббуси маъқулланди.
Олий Мажлис Сенатининг 2020 йил 11 сентябрдаги «Наманган вилоятининг Наманган шаҳри таркибида Давлатобод туманини ташкил этиш тўғрисида»ги қарори билан янги туманга асос солинди.
Қайта ташкил этилган Давлатобод тумани ҳудуди 4686 гектарга тенг бўлиб, Наманган шаҳри ҳудудининг 26 фоизини ташкил этади. Туманнинг 25 та маҳалласида 150 минг нафар аҳоли истиқомат қилади.
Туман ҳудудида «Юксалиш» ва «Орзу» кичик саноат зоналари, «Навбаҳор» стадиони, «Афсоналар водийси» боғи, 5 та замонавий меҳмонхона жойлашган. Namangan City ҳам шу ерда барпо этилади.
Сессияда ташкилий масала кўрилди. Шу пайтга қадар вилоят ҳокимлигининг саноатни ривожлантириш, капитал қурилиш, коммуникациялар ва коммунал хўжалик масалалари котибияти мудири этиб ишлаб келган Анваржон Тожимирзаев Давлатобод тумани ҳокими этиб тайинланди. Муҳаммадали Қирғизбоев туман прокурори, Умид Бойхонов эса туман ИИБ бошлиғи лавозимини эгаллади.
Изоҳ (0)