Farg‘ona davlat universitetida talabalarning farzandlari uchun “Bolajon” innovatsiya markazi tashkil etilgan. Bu haqda O‘zbekiston Gender tenglikni ta’minlash masalalari bo‘yicha komissiyasi tomonidan 12-noyabr kuni o‘tkazilgan matbuot anjumanida ma’lum qilindi, deya xabar bermoqda “Daryo” muxbiri Musulmonbek Ibrohimov.
Senat raisi Tanzila Norboyevaning ta’kidlashicha, talabalik vaqtida turmushga chiqqan qizlar farzandli bo‘lgach, aksariyat hollarda o‘qishni davom ettirolmaydi. Shu bois Gender tenglikni ta’minlash masalalari bo‘yicha komissiyasi yangi tashabbus bilan chiqqan — Farg‘ona davlat universitetida farzandli talabalar uchun “Bolajon” innovatsiya markazi tashkil etilgan.
“Bu markazga talabalar bolasini olib kelib, darsdan so‘ng olib ketishi mumkin. Shuningdek, talabalarning turmush o‘rtog‘i bolani markazga olib kelib, farzandini ovqatlantirib, qaytarib olib ketishi mumkin. O‘ylaymanki, ushbu tashabbus boshqa oliy ta’lim muassasalarida ham joriy etiladi”, — dedi Tanzila Norboyeva.
Farg‘ona davlat universiteti tabiiy fanlar dekani Shuhrat Mamajonovning “Daryo”ga ma’lum qilishicha, “Bolajon” innovatsiya markaziga universitet budjetdan tashqari mablag‘lari hisobidan 296 million so‘m sarflangan. Markaz 50 o‘ringa mo‘ljallangan bo‘lib, kichik (2-3 yoshli bolalar) va katta (4-5 yoshli bolalar) yoshli bolalar guruhlariga bo‘lingan.
Izoh (0)