Vengriya Rossiyaning COVID-19’ga qarshi “Sputnik V” vaksinasini sinovdan o‘tkazadigan birinchi Yevropa Ittifoqi mamlakati bo‘ldi. Bu haqda mamlakat tashqi ishlar va tashqi savdo vaziri Peter Siyarto ma’lum qildi, deb yozmoqda “RBK”.
Siyartoning so‘zlariga ko‘ra, dastlabki ma’lumotlar Rossiya vaksinasining 92 foiz samaradorligini ko‘rsatmoqda, Budapeshtda bunday natija yaxshi deb hisoblanmoqda. Laboratoriya tekshiruvi uchun vaksinaning birinchi namunasi mamlakatga bir yarim hafta ichida yetib keladi. Dekabr oyida vaksinaning kichik partiyasi bilan klinik sinovlar boshlanadi va vaksina yanvar oyining ikkinchi yarmida mamlakatga ko‘p miqdorda kela boshlaydi.
Siyarto 13-noyabr kuni Rossiya sanoat va savdo vazirligi rahbari Denis Manturov bilan muzokaralar olib boradi, yig‘ilishda Vengriyaning vaksina ishlab chiqaruvchi kompaniyasi vakillari ishtirok etadi. Vengriyada “Sputnik V” vaksinasini ishlab chiqarish imkoniyati ko‘rib chiqiladi.
Shu bilan birga, Siyarto Vengriya hukumati maksimal samaradorlikni ta’minlash uchun bir nechta vaksinalarni sinovdan o‘tkazmoqchi ekanligini ta’kidladi.
Siyarto RT’ga bergan intervyusida hozirda dunyoda emlash masalasi siyosiylashib ketganini ta’kidladi. “Ba’zida menga vaksinalar masalasi haddan tashqari siyosiylashtirilgan ko‘rinadi, menimcha, bunga yo‘l qo‘ymaslik kerak. Shunga qaramay, biz kim bo‘lishidan qat’i nazar, vaksinalarni ishlab chiqaradigan barcha kompaniyalar va mamlakatlarning muvaffaqiyatlarini kutmoqdamiz. Biz Amerika, Yevropa, Rossiya, Xitoy, Isroil tadqiqotlari va vaksinalarni ishlab chiqish muvaffaqiyatidan manfaatdormiz”, — deya fikrini bildirgan vazir.
Oktabr oyi oxirida Vengriya bosh vaziri Viktor Orban Moskva bilan vaksinalar yetkazib berish bo‘yicha munozara olib borilayotganini e'lon qilgan. Vengriya Rossiya vaksinasini sotib olishi mumkinligi noyabr oyining boshida ma’lum bo‘ldi.
Yevropa komissiyasi Vengriyaga agar Rossiya vaksinasini sotib olsa, unga nisbatan ma’muriy choralar ko‘rish bilan tahdid qildi. Komissiya vakili Erik Mamerning ta’kidlashicha, Yevropa Ittifoqi mamlakatlari faqat “Yevropa Ittifoqi sifat standartlariga to‘liq mos keladigan va Yevropa Ittifoqi bozorida sertifikatlash tartibidan o‘tgan” dorilarni sotib olish huquqiga ega.
Eslatib o‘tamiz, “Sputnik V” vaksinasi yaratuvchilari uning samaradorligini 92 foiz deb baholadi. Bu esa samaradorligi 90 foizga baholangan AQShning Pfizer kompaniyasi tomonidan yaratilgan vaksina ko‘rsatkichidan yuqori.
Avvalroq Rossiyaning Kemerovo viloyatidagi shifokorlardan biri COVID-19’ga qarshi birinchi “Sputnik V” vaksinasi bilan amalga oshirilgan emlashdan so‘ng koronavirusga chalingani, shuningdek, Oltoy o‘lkasida “Sputnik V” vaksinasi bilan emlangan uch shifokor ham koronavirusga chalingani haqida xabarlar berilgandi.
Shuningdek, Pfizer va BioNTech tomonidan ishlab chiqilgan vaksinani saqlash va tashish uchun o‘ta past haroratni ta’minlash zarurati uni kerakli infratuzilmani ta’minlay olmaydigan mamlakatlarga sotish uchun jiddiy to‘siq bo‘lishi mumkinligi ma’lum qilindi.
Izoh (0)