Венгрия Россиянинг COVID-19’га қарши «Спутник V» вакцинасини синовдан ўтказадиган биринчи Европа Иттифоқи мамлакати бўлди. Бу ҳақда мамлакат ташқи ишлар ва ташқи савдо вазири Петер Сиярто маълум қилди, деб ёзмоқда «РБК».
Сияртонинг сўзларига кўра, дастлабки маълумотлар Россия вакцинасининг 92 фоиз самарадорлигини кўрсатмоқда, Будапештда бундай натижа яхши деб ҳисобланмоқда. Лаборатория текшируви учун вакцинанинг биринчи намунаси мамлакатга бир ярим ҳафта ичида етиб келади. Декабрь ойида вакцинанинг кичик партияси билан клиник синовлар бошланади ва вакцина январь ойининг иккинчи ярмида мамлакатга кўп миқдорда кела бошлайди.
Сиярто 13 ноябрь куни Россия саноат ва савдо вазирлиги раҳбари Денис Мантуров билан музокаралар олиб боради, йиғилишда Венгриянинг вакцина ишлаб чиқарувчи компанияси вакиллари иштирок этади. Венгрияда «Спутник V» вакцинасини ишлаб чиқариш имконияти кўриб чиқилади.
Шу билан бирга, Сиярто Венгрия ҳукумати максимал самарадорликни таъминлаш учун бир нечта вакциналарни синовдан ўтказмоқчи эканлигини таъкидлади.
Сиярто RТ’га берган интервьюсида ҳозирда дунёда эмлаш масаласи сиёсийлашиб кетганини таъкидлади. «Баъзида менга вакциналар масаласи ҳаддан ташқари сиёсийлаштирилган кўринади, менимча, бунга йўл қўймаслик керак. Шунга қарамай, биз ким бўлишидан қатъи назар, вакциналарни ишлаб чиқарадиган барча компаниялар ва мамлакатларнинг муваффақиятларини кутмоқдамиз. Биз Америка, Европа, Россия, Хитой, Исроил тадқиқотлари ва вакциналарни ишлаб чиқиш муваффақиятидан манфаатдормиз», — дея фикрини билдирган вазир.
Октябрь ойи охирида Венгрия бош вазири Виктор Орбан Москва билан вакциналар етказиб бериш бўйича мунозара олиб борилаётганини эълон қилган. Венгрия Россия вакцинасини сотиб олиши мумкинлиги ноябрь ойининг бошида маълум бўлди.
Европа комиссияси Венгрияга агар Россия вакцинасини сотиб олса, унга нисбатан маъмурий чоралар кўриш билан таҳдид қилди. Комиссия вакили Эрик Мамернинг таъкидлашича, Европа Иттифоқи мамлакатлари фақат «Европа Иттифоқи сифат стандартларига тўлиқ мос келадиган ва Европа Иттифоқи бозорида сертификатлаш тартибидан ўтган» дориларни сотиб олиш ҳуқуқига эга.
Эслатиб ўтамиз, «Спутник V» вакцинаси яратувчилари унинг самарадорлигини 92 фоиз деб баҳолади. Бу эса самарадорлиги 90 фоизга баҳоланган АҚШнинг Pfizer компанияси томонидан яратилган вакцина кўрсаткичидан юқори.
Аввалроқ Россиянинг Кемерово вилоятидаги шифокорлардан бири COVID-19’га қарши биринчи «Спутник V» вакцинаси билан амалга оширилган эмлашдан сўнг коронавирусга чалингани, шунингдек, Олтой ўлкасида «Спутник V» вакцинаси билан эмланган уч шифокор ҳам коронавирусга чалингани ҳақида хабарлар берилганди.
Шунингдек, Pfizer ва BioNTech томонидан ишлаб чиқилган вакцинани сақлаш ва ташиш учун ўта паст ҳароратни таъминлаш зарурати уни керакли инфратузилмани таъминлай олмайдиган мамлакатларга сотиш учун жиддий тўсиқ бўлиши мумкинлиги маълум қилинди.
Изоҳ (0)