Armaniston Maxsus tergov xizmati Yerevanda ommaviy yig‘ilishlarni noqonuniy tashkil etish bo‘yicha jinoiy ish doirasida muxolifatning 10 nafar rahbari qo‘lga olinganini ma’lum qildi, deb xabar bermoqda Meduza “Interfaks”ga tayanib.
Muxolifatchilarning ayrimlari, shuningdek, davlat sirlarini o‘z ichiga olgan hujjatlar bilan ishlash qoidalarini buzganlikda ayblanmoqda.
Bundan tashqari, muxolifatchilarning o‘zi yana besh nafar vakillari qo‘lga olinganini ma’lum qilgan.
Eslatib o‘tamiz, Yerevanda 10-noyabrdan buyon ommaviy noroziliklar davom etmoqda. Bunga Armaniston bosh vaziri Nikol Pashinyan Tog‘li Qorabog‘dagi urushni tugatish to‘g‘risidagi bitimni imzolagani sabab bo‘lgan. Bitimga ko‘ra Tog‘li Qorabog‘ hududining qariyb yarmi Ozarbayjon nazoratiga o‘tadi. Namoyishchilar kelishuvni “sotqinlik” deb atagan va uni imzolagan Pashinyan iste’fosini talab qilmoqda.
Pashinyanning o‘zi ushbu bitimni imzolashdan boshqa chorasi qolmaganini aytgan. Uning fikricha, Armaniston jangovar harakatlarni davom ettirganida, nafaqat Tog‘li Qorabog‘ poytaxti Stepanakertni, balki butun Tog‘li Qorabog‘ni qo‘ldan chiqargan, minglab harbiy xizmatchilar qurshovda qolib ketgan bo‘lardi.
“Vatan” muxolifat partiyasi yetakchisi Artur Vanesyan Armaniston Tog‘li Qorabog‘da o‘t ochishni to‘xtatish to‘g‘risidagi bitim shartlarini mamlakatda hukumat almashganidan so‘ng o‘zgartirishi mumkinligini ma’lum qilgan.
Izoh (0)