Xalq ta’limi vazirligi axborot xizmati maktablarda sinf rahbarlari uchun to‘lovlarning oshirilgan miqdori haqida ma’lumot berdi.
Unga ko‘ra sinf rahbarligi uchun qo‘shimcha to‘lovlar mehnatga haq to‘lashning eng kam miqdoriga nisbatan quyidagi foizlar hisobida amalga oshiriladi:
- 15 nafargacha o‘quvchi – 26,4 foiz (179 343 so‘m);
- 16 nafardan 20 nafargacha o‘quvchi – 31,6 foiz (214 668 so‘m);
- 21 nafardan 25 nafargacha o‘quvchi – 36,9 foiz (250 673 so‘m);
- 26 nafardan 30 nafargacha o‘quvchi – 42,1 foiz (285 998 so‘m);
- 31 nafar va undan ko‘p o‘quvchi bo‘lganda – 52,8 foiz (358 686 so‘m) tashkil etadi.
Avval O‘zbekiston xalq ta’limi vazirining birinchi o‘rinbosari Usmon Sharifxo‘jayev ishonchli boshqaruvga beriladigan maktablar haqida gapirgan, shuningdek, 90 foiz bitiruvchisi OTMga kirgan maktab direktorlariga pul mukofoti berilishini bildirgandi.
Eslatib o‘tamiz, Shavkat Mirziyoyev raisligida 2020-yil 30-oktabrda ta’lim sohasidagi muammolar, ularni hal etish va ta’lim sifatini oshirishga bag‘ishlab o‘tkazilgan videoselektorda har bir maktab reytingini hamda shu asosda ta’lim sifati bo‘yicha tuman, shahar va viloyatlar reytingini ishlab chiqish zarurligi aytilgan. Reyting natijalariga qarab, maktab direktorlari va o‘rinbosarlari, o‘qituvchilar, hokimlar va ularning ta’lim bo‘yicha maslahatchilari faoliyatiga baho berilishi qayd etilgandi.
Reytingda birinchi beshlikka kirgan maktab direktorlariga mahalliy budjetdan ustama to‘lanishi, xususan, maktab direktorlari va ularning o‘rinbosarlariga mehnatga haq to‘lashning eng kam miqdorining 3 baravaridan 12 baravarigacha rag‘batlantiruvchi to‘lovlar berilishi mumkinligi ham ta’kidlangan. Prezident mazkur islohotlardan asosiy maqsad maktablarning samarali faoliyatini tashkil etish, direktorlar ishiga noqonuniy aralashuvlar va kadrlar qo‘nimsizligiga barham berish ekanini qayd etgan.
Izoh (0)