Халқ таълими вазирлиги ахборот хизмати мактабларда синф раҳбарлари учун тўловларнинг оширилган миқдори ҳақида маълумот берди.
Унга кўра синф раҳбарлиги учун қўшимча тўловлар меҳнатга ҳақ тўлашнинг энг кам миқдорига нисбатан қуйидаги фоизлар ҳисобида амалга оширилади:
- 15 нафаргача ўқувчи – 26,4 фоиз (179 343 сўм);
- 16 нафардан 20 нафаргача ўқувчи – 31,6 фоиз (214 668 сўм);
- 21 нафардан 25 нафаргача ўқувчи – 36,9 фоиз (250 673 сўм);
- 26 нафардан 30 нафаргача ўқувчи – 42,1 фоиз (285 998 сўм);
- 31 нафар ва ундан кўп ўқувчи бўлганда – 52,8 фоиз (358 686 сўм) ташкил этади.
Аввал Ўзбекистон халқ таълими вазирининг биринчи ўринбосари Усмон Шарифхўжаев ишончли бошқарувга бериладиган мактаблар ҳақида гапирган, шунингдек, 90 фоиз битирувчиси ОТМга кирган мактаб директорларига пул мукофоти берилишини билдирганди.
Эслатиб ўтамиз, Шавкат Мирзиёев раислигида 2020 йил 30 октябрда таълим соҳасидаги муаммолар, уларни ҳал этиш ва таълим сифатини оширишга бағишлаб ўтказилган видеоселекторда ҳар бир мактаб рейтингини ҳамда шу асосда таълим сифати бўйича туман, шаҳар ва вилоятлар рейтингини ишлаб чиқиш зарурлиги айтилган. Рейтинг натижаларига қараб, мактаб директорлари ва ўринбосарлари, ўқитувчилар, ҳокимлар ва уларнинг таълим бўйича маслаҳатчилари фаолиятига баҳо берилиши қайд этилганди.
Рейтингда биринчи бешликка кирган мактаб директорларига маҳаллий бюджетдан устама тўланиши, хусусан, мактаб директорлари ва уларнинг ўринбосарларига меҳнатга ҳақ тўлашнинг энг кам миқдорининг 3 бараваридан 12 бараваригача рағбатлантирувчи тўловлар берилиши мумкинлиги ҳам таъкидланган. Президент мазкур ислоҳотлардан асосий мақсад мактабларнинг самарали фаолиятини ташкил этиш, директорлар ишига ноқонуний аралашувлар ва кадрлар қўнимсизлигига барҳам бериш эканини қайд этган.
Изоҳ (0)