Daniyada miyasida o‘simtasi bor kelin to‘yidan 15 daqiqa o‘tib vafot etdi, deb yozadi Metro.
2018-yilning yozida 41 yoshli Lu Tulin Simonsen va 49 yoshli londonlik Shaff Prabatani munosabatlarining o‘n yilligini nishonlayotganida ayol boshidagi og‘riqdan shikoyat qilib qolgan. Tez orada uning ahvoli og‘irlashgan va u shifokorga murojaat qilgan, biroq unga aniq tashxis qo‘yilmagan. Oktabrga borib Simonsen muntazam qayt qila boshlagan va deyarli hech nimani ko‘rmay qolgan. U yana bir bor terapevt qabuliga borgan va oradan birmuncha vaqt o‘tgach uni kompyuter tomografiyasidan o‘tkazishgan hamda miyada o‘simda borligi aniqlangan.
Shifokorlar u 1-2 yil umr ko‘rishini prognoz qilgan. Simonsen 30 ta nur terapiyasini olganidan so‘ng o‘simta o‘zini “yomon tutish”ni to‘xtatgan. Shunda Prabatani suyuklisining asosiy orzusini amalga oshirib, 2019-yilning yanvarida uning qo‘lini so‘ragan. Bunga qadar u oila qurishga mutlaqo qarshi bo‘lgan. Simonsen o‘zining sog‘ayib ketishiga ishongan va saratonni yenggach to‘y o‘tkazishlarini xohlagan.
2019-yilning avgustida juftlik Daniyaga borib, kelinning qarindoshlari holidan xabar olgan. Safar davomida ayolning ahvoli og‘irlashgan va kuyov shu yerning o‘zida to‘y o‘tkazishni so‘ragan. Ular bir hafta ichida marosimni tashkillashtirishga muvaffaq bo‘lgan. 12-avgust kuni Simonsen va Prabatani er-xotinga aylangan. Marosim yakunlanganidan 15 daqiqa o‘tib ayol vafot etgan.
Prabatani turmush o‘rtog‘ining xotirasi uchun uyi yaqinidan kichik ko‘cha kutubxonasini ochgan: “Luning kichik kutubxonasi” yozuvi tushirilgan javondan kitoblar o‘rin olgan.
Eslatib o‘tamiz, 2014-yilda 29 yoshli saratonga chalingan bemor nikoh to‘yidan o‘n soat o‘tmay vafot etgandi.
Izoh (0)