Данияда миясида ўсимтаси бор келин тўйидан 15 дақиқа ўтиб вафот этди, деб ёзади Metro.
2018 йилнинг ёзида 41 ёшли Лу Тулин Симонсен ва 49 ёшли лондонлик Шафф Прабатани муносабатларининг ўн йиллигини нишонлаётганида аёл бошидаги оғриқдан шикоят қилиб қолган. Тез орада унинг аҳволи оғирлашган ва у шифокорга мурожаат қилган, бироқ унга аниқ ташхис қўйилмаган. Октябрга бориб Симонсен мунтазам қайт қила бошлаган ва деярли ҳеч нимани кўрмай қолган. У яна бир бор терапевт қабулига борган ва орадан бирмунча вақт ўтгач уни компьютер томографиясидан ўтказишган ҳамда мияда ўсимда борлиги аниқланган.
Шифокорлар у 1-2 йил умр кўришини прогноз қилган. Симонсен 30 та нур терапиясини олганидан сўнг ўсимта ўзини «ёмон тутиш»ни тўхтатган. Шунда Прабатани суюклисининг асосий орзусини амалга ошириб, 2019 йилнинг январида унинг қўлини сўраган. Бунга қадар у оила қуришга мутлақо қарши бўлган. Симонсен ўзининг соғайиб кетишига ишонган ва саратонни енггач тўй ўтказишларини хоҳлаган.
2019 йилнинг августида жуфтлик Данияга бориб, келиннинг қариндошлари ҳолидан хабар олган. Сафар давомида аёлнинг аҳволи оғирлашган ва куёв шу ернинг ўзида тўй ўтказишни сўраган. Улар бир ҳафта ичида маросимни ташкиллаштиришга муваффақ бўлган. 12 август куни Симонсен ва Прабатани эр-хотинга айланган. Маросим якунланганидан 15 дақиқа ўтиб аёл вафот этган.
Прабатани турмуш ўртоғининг хотираси учун уйи яқинидан кичик кўча кутубхонасини очган: «Лунинг кичик кутубхонаси» ёзуви туширилган жавондан китоблар ўрин олган.
Эслатиб ўтамиз, 2014 йилда 29 ёшли саратонга чалинган бемор никоҳ тўйидан ўн соат ўтмай вафот этганди.
Изоҳ (0)