Hindistonda “o‘lik” chaqaloq dafn qilinishidan avval uyg‘onib ketdi

Hindistonning Assam shtatida o‘lik deb taxmin qilingan chaqaloq ko‘milishidan oldin uyg‘ondi. Bu haqda Times of India xabar berdi.

Ma’lum bo‘lishicha, ota-ona ikki oylik kasal chaqalog‘ini shifoxonaga olib kelgan, ammo o‘sha vaqtda hech qanday shifokor va hamshira topilmagan. Lekin yosh farmatsevt chaqaloqni tekshirib, uni o‘lik deb topgan.

Ota-ona bolani ko‘mishga tayyorgarlik ko‘ra boshlaganida chaqaloq onasining quchog‘ida qimirlagan. Ular bolani yana kasalxonaga olib borishga shoshilgan, so‘ngra chaqaloqni kattaroq tibbiy muassasaga yetkazishga qaror qilgan, ammo bola yo‘lda vafot etgan.

Ertasi kuni shifoxona oldida bolaning ota-onasi ishlaydigan choy plantatsiyasining 1200 ga yaqin ishchisi yig‘ilgan. Namoyish politsiya idorasi oldida ham davom etgan. Namoyishchilar bolaning hayotiga nisbatan xato qaror qabul qilgan farmatsevt hibsga olinishini talab qilgan.