Арманистон Махсус тергов хизмати Ереванда оммавий йиғилишларни ноқонуний ташкил этиш бўйича жиноий иш доирасида мухолифатнинг 10 нафар раҳбари қўлга олинганини маълум қилди, деб хабар бермоқда Meduza «Интерфакс»га таяниб.
Мухолифатчиларнинг айримлари, шунингдек, давлат сирларини ўз ичига олган ҳужжатлар билан ишлаш қоидаларини бузганликда айбланмоқда.
Бундан ташқари, мухолифатчиларнинг ўзи яна беш нафар вакиллари қўлга олинганини маълум қилган.
Эслатиб ўтамиз, Ереванда 10 ноябрдан буён оммавий норозиликлар давом этмоқда. Бунга Арманистон бош вазири Никол Пашинян Тоғли Қорабоғдаги урушни тугатиш тўғрисидаги битимни имзолагани сабаб бўлган. Битимга кўра Тоғли Қорабоғ ҳудудининг қарийб ярми Озарбайжон назоратига ўтади. Намойишчилар келишувни «сотқинлик» деб атаган ва уни имзолаган Пашинян истеъфосини талаб қилмоқда.
Пашиняннинг ўзи ушбу битимни имзолашдан бошқа чораси қолмаганини айтган. Унинг фикрича, Арманистон жанговар ҳаракатларни давом эттирганида, нафақат Тоғли Қорабоғ пойтахти Степанакертни, балки бутун Тоғли Қорабоғни қўлдан чиқарган, минглаб ҳарбий хизматчилар қуршовда қолиб кетган бўларди.
«Ватан» мухолифат партияси етакчиси Артур Ванесян Арманистон Тоғли Қорабоғда ўт очишни тўхтатиш тўғрисидаги битим шартларини мамлакатда ҳукумат алмашганидан сўнг ўзгартириши мумкинлигини маълум қилган.
Изоҳ (0)