Peru Kongressi respublika prezidenti Martin Viskarrani lavozimidan chetlatdi. Bu haqda parlamentning Facebook’dagi sahifasida xabar berildi, deb yozadi “RBK”.
Bu qarorni 105 nafar parlament a’zosi qo‘llab-quvvatladi, 19 nafari qarshi chiqdi, to‘rt kishi betaraf qoldi.
Konstitutsiyaga muvofiq, davlat rahbari o‘rnini parlament spikeri Merino de Lama egallab turadi, 10-noyabr kuni u qasamyod qabul qiladi. El Peruano gazetasining yozishicha, Viskarrani lavozimidan chetlatish qarori uning “ma’naviy nochorligi” tufayli qabul qilingan.
Expreso ma’lumotlariga ko‘ra, Viskarra Mokegua mintaqasiga rahbarlik qilish davrida yirik miqdorda poralar olganlikda ayblanmoqda.
Sentabrda Peru parlamenti Viskarraga nisbatan impichmentga qarshi ovoz bergan edi. O‘shanda deputat Fransisko Sagasti buni mamlakat koronavirus pandemiyasi sharoitlarida yashayotgan bir paytda hozir impichmentning vaqti emasligi bilan izohlagan edi.
O‘shanda berilgan xabarlarga ko‘ra, impichment jarayoni davlat rahbariga tegishli audioyozuv e’lon qilinganidan keyin boshlangan. Unda prezident qo‘shiqchi Richard Sving bilan uchrashganini tan olgan. Viskarra Madaniyat vazirligi bilan shartnoma tufayli qo‘shiqchiga nisbatan sud ishi yuzasidan tekshiruvlarga to‘sqinlik qilishda ayblangandi.
Viskarra prezident lavozimini 2018-yilda Pedro Kuchinski iste’fo berganidan keyin egallagan, Kuchinskiga nisbatan ham impichment jarayoni tashkillashtirilgan edi. Peruda prezident va Parlament saylovlari 2021-yil 11-aprelga belgilangan.
Izoh (0)