Перу Конгресси республика президенти Мартин Вискаррани лавозимидан четлатди. Бу ҳақда парламентнинг Facebook’даги саҳифасида хабар берилди, деб ёзади «РБК».
Бу қарорни 105 нафар парламент аъзоси қўллаб-қувватлади, 19 нафари қарши чиқди, тўрт киши бетараф қолди.
Конституцияга мувофиқ, давлат раҳбари ўрнини парламент спикери Мерино де Лама эгаллаб туради, 10 ноябрь куни у қасамёд қабул қилади. El Peruano газетасининг ёзишича, Вискаррани лавозимидан четлатиш қарори унинг «маънавий ночорлиги» туфайли қабул қилинган.
Expreso маълумотларига кўра, Вискарра Мокегуа минтақасига раҳбарлик қилиш даврида йирик миқдорда поралар олганликда айбланмоқда.
Сентябрда Перу парламенти Вискаррага нисбатан импичментга қарши овоз берган эди. Ўшанда депутат Франциско Сагасти буни мамлакат коронавирус пандемияси шароитларида яшаётган бир пайтда ҳозир импичментнинг вақти эмаслиги билан изоҳлаган эди.
Ўшанда берилган хабарларга кўра, импичмент жараёни давлат раҳбарига тегишли аудиоёзув эълон қилинганидан кейин бошланган. Унда президент қўшиқчи Ричард Свинг билан учрашганини тан олган. Вискарра Маданият вазирлиги билан шартнома туфайли қўшиқчига нисбатан суд иши юзасидан текширувларга тўсқинлик қилишда айбланганди.
Вискарра президент лавозимини 2018 йилда Педро Кучински истеъфо берганидан кейин эгаллаган, Кучинскига нисбатан ҳам импичмент жараёни ташкиллаштирилган эди. Перуда президент ва Парламент сайловлари 2021 йил 11 апрелга белгиланган.
Изоҳ (0)