O‘zbekistonda amalga oshirilayotgan islohotlarning mazmun-mohiyati va ahamiyatini aholiga yetkazish, targ‘ibot tadbirlarini mahallalar bo‘yicha o‘tkazish, aholi kayfiyatini ko‘tarish maqsadida “Yangi O‘zbekiston – yangicha dunyoqarash” ma’naviy-ma’rifiy targ‘ibot tadbirlarini tashkil etish rejalashtirilgan.
Unga Toshkentdan yuzlab professorlar, san’atkorlar, madaniyat va adabiyot namoyandalari viloyatlarga targ‘ibot qilish uchun yuboriladi. Huquqshunos va bloger Xushnudbek Xudoyberdiyev bu targ‘ibot ishlariga oliy ta’lim muassasalaridagi kafedralar ham biriktirilganiga e’tibor qaratdi.
Bloger o‘z kanalida targ‘ibot bo‘yicha oliy ta’lim muassasalaridagi kafedralar amalga oshirishi kerak bo‘lgan ishlar ro‘yxati aks etgan suratni joylab, “ular ta’lim berish bilan bir qatorda, targ‘ibot bilan ham qattiq shug‘ullanishi va rasmda ko‘rsatilgan ishlarni amalga oshirishi kerak”, — deb yozgan.
Uning aytishicha, respublika Ma’naviyat va ma’rifat markazi Toshkentdan boradigan targ‘ibot guruhlari uchun 300 million so‘mlik temiryo‘l chiptalari va 200 million so‘mlik aviachiptalar sotib olishga shartnoma tuzdi. “Targ‘ibot guruhlarining yotog‘i, yeyish-ichishi, hududlardagi transporti va boshqa xarajatlari qancha bo‘lishi hozircha noma’lum”, — deydi bloger.
“Ushbu targ‘ibot guruhlari Toshkentdan viloyatlarga o‘zlari bilan gaz, svet, ichimlik suvi, ish joylari olib borishadimi yoki yo‘qmi, bunisi hozircha noma’lum”, — deydi huquqshunos.
Avvalroq Namanganda “Yangi O‘zbekiston – yangicha dunyoqarash” shiori ostida tashkillashtirilgan marafon shahar ko‘chalarida tirbandliklarni yuzaga keltirgani, shahar aholisi marafon haftaning dushanba — ish kunida o‘tkazilganidan norozi bo‘lgani haqida xabar berilgan edi.
Izoh (0)