Navoiy viloyat hokimi Qobul Tursunovga maktablarga ko‘rsatilayotgan yuksak e’tibor uchun “Xalq ta’limi homiysi” ko‘krak nishoni topshirildi. Bu haqda Xalq ta’lim vazirligining axborot xizmati xabar bergan.
Qayd etilishicha, Navoiy viloyatida so‘nggi yillarda maktablarni rivojlantirish uchun 30 milliard so‘mdan ortiq mablag‘ ajratilgan.
“Viloyatda maktablarning moddiy-texnik bazasini yaxshilash, ularda zamonaviy ta’lim olish uchun sharoitlarni yaratish, maktablar sport zallarini zaruriy sport inventarlari, tibbiyot xonalari, kompyuter texnikalari bilan ta’minlash doimiy tarzda amalga oshirilmoqda.
Bugungi kunda viloyatdagi bitiruvchilarning OTMga kirish ko‘rsatkichi eng yuqori natijani qayd etgan”, – deyiladi xabarda.
Ta’kidlanishicha, maktablarni zamonaviy jihozlash, joriy ta’mirlash, issiq suv bilan ta’minlash, tuman maktablaridagi mavjud burjuyka pechlari o‘rniga zamonaviy isitish tizimi va isitish qozonlari o‘rnatish, qo‘shimcha o‘quv binolari qurib berish, xalq ta’limi bo‘limlarini avtomashinalar bilan ta’minlash hokimlikning doimiy diqqat markazidagi masalalardan bo‘lib kelmoqda.
Viloyatda eng yaxshi natija ko‘rsatayotgan fidoyi o‘qituvchilarni uy bilan ta’minlash bo‘yicha ham rejalar belgilangan.
Eslatib o‘tamiz, bir yil avval 2019-yil 12-noyabrda Surxondaryo viloyati hokimi To‘ra Bobolov “Xalq ta’limi homiysi” ko‘krak nishoni bilan taqdirlangan, bir oy o‘tgach farg‘onalik tadbirkor Saidmahmud Sultonovga Xalq ta’limi vazirligining “Ta’lim homiysi” ko‘krak nishoni topshirilgan.
Keyinchalik, 2020-yil oktabr oyida Xalq ta’limi vaziri Sherzod Shermatov Xorazm viloyati hokimi Farhod Ermanov “Ta’lim homiysi” ko‘krak nishoni bilan taqdirlagan.
Izoh (0)