Тошкентда ярим йил COVID-19 беморлари орасида яшаб касал бўлмаган бош шифокор мактабга чиқа бошлаган неварасидан коронавирус юқтириб олди

Тошкентдаги Вирусология илмий текшириш институти бош шифокори, тиббиёт фанлари доктори Муҳайё Асилова ярим йил COVID-19 беморлари орасида яшаб касал бўлмасдан, мактабга чиқа бошлаган неварасидан коронавирус юқтириб олди. Бу ҳақда у «Kun.uz»га берган интервьюсида сўзлаб берган.

«Уйдан чиқиб кетаётганимда неварам 7 ойлик эди. Қайтсам, у бир ёшдан ошган, анча катта бўлиб қолган. Тошкентда бўлсангиз ҳам уйга боролмайсиз, уларни бағрингизга босолмайсиз. Шу пайтгача ҳеч қачон бунақа ҳолатга тушмаганмиз.

Лекин биз жамоа билан астойдил чин юракдан ишладик. Шахсан ўзим эрталаб кириб кетардим, соат 16:00 ларгача ҳам қолиб кетардим. Бу биринчи текширув эди. Ҳар бир касални кўриб, уларнинг тепасида ўтириб, ҳаммасини кўриб чиқардик-да, кейин тушлик қилиб, тушликдан кейин яна соат 18:00 ларда кириб кетиб, соат 00:00 гача қолиб кетардик.

Албатта, бу айниқса ёз пайтида қийин бўлди. Чилла вақтида комбинезон, ниқоб, респираторда, қўлимизда 2 тадан қўлқоп билан қийин бўлди. Лекин шуни айтишим мумкинки, мен карантинда ишлаган шу 6 ой давомида бўлганимда менга вирус юқмади. Сентябрь ойига келиб, неварам мактабга бора бошлаганда ўша ердан юқтириб олди, келиб менга ҳам юқтирди», — дейди Муҳайё Асилова.

Шунингдек, у март ойида коронавирус бўлган биринчи касалнинг олдига қандай киргани, беморлар ҳам, шифокорлар ҳам COVID-19 бўйича тажрибага эга бўлмагани сабаб қўрқувга тушгани тўғрисида гапириб берган.

 

Асилованинг сўзларига кўра, дастлаб март ойида асосий қийинчилик ташкилий масала бўлган. Июль ойи эса Тошкент шаҳрида жуда оғир келган.

«Асосий оғир касалларга кислород жуда ҳам керак. Шунақа пайтда Юнусобод ҳокимияти томонидан кислород нуқталари кўпайтириб берилди. Бундан ташқари, ҳомийлар 8 та нуқтамизни 40 тагача кўпайтириб беришди. Бу эса жуда ҳам керак эди», — дейди Вирусология илмий текшириш институти бош шифокори.

Бундан ташқари, у шифокорлар COVID-19’ га чалинган оғир касалларни, вафот этганларни кўриб, руҳан жуда ҳам эзилгани, у ердан чиққандан кейин шифокорнинг руҳан тикланиши осон кечмагани ҳақида гапирган.

Таъкидланишича, Тошкентда беморлар сони анча камая бошлагани сабаб 1 ноябрдан бошлаб Вирусология илмий текшириш институти ўз фаолиятига қайтган.

Аввалроқ Муҳайё Асилова август ойининг бошларида Ўзбекистонда пандемия бошланганидан буён коронавирусга чалинганларнинг қайта касалланиши ҳолатлари кузатилмаганини маълум қилганди.

Эслатиб ўтамиз, Ўзбекистонда коронавирусга чалиниш билан боғлиқ биринчи ҳолат 15 март куни қайд этилганди. Санитария-эпидемиологик осойишталик агентлиги бемор 14 март куни Республика Вирусология илмий-тадқиқот институти клиникасига COVID-19 коронавирус инфекциясида гумон қилиниб, ётқизилгани ҳақида хабар берган. Бемор 28 февралдан 11 мартга қадар Францияда саёҳатда бўлган. 11 мартда Париж—Тошкент рейси билан Тошкентга учиб келган. Аэропортда санитария-карантин пунктида термометрия ҳамда бирламчи тиббий текширувдан ўтказилган ва касаллик белгилари аниқланмаган. Шундан сўнг йўловчининг яшаш манзилига аниқлик киритилиб, у уй шароитида 14 кунлик тиббий кузатувга олинган.