O‘zbekiston Rossiyaning “Lukoyl” kompaniyasi oldidagi gaz bo‘yicha qarzdorligini muntazam qoplab kelmoqda. Bu haqda energetika vaziri o‘rinbosari Behzod Normatov 6-noyabr, juma kuni bo‘lib o‘tgan matbuot anjumanida ma’lum qildi, deya xabar bermoqda “Gazeta.uz”.
O‘zbekiston 2018-yilda yetkazib berilgan gaz uchun “Lukoyl”dan 600 million dollar miqdorida qarz bo‘lib qolgani 2019-yil mart oyida ma’lum bo‘lgan edi. Rossiya kompaniyasi Qandim—Hovuzak—Shodi—Qo‘ng‘irot va Janubi-Sharqiy Hisor loyihalarida mahsulot taqsimotiga oid bitim (MTB) shartlari asosida ishlaydi.
Qarzdorlik O‘zbekiston “Lukoyl” qazib olgan gazning bir qismini ichki bozor uchun olib qolgani ortidan yuzaga kelgan, vaholanki MTB shartlarida “Lukoyl” O‘zbekistonda qazib olgan gazining hammasini eksport qilishi belgilangan. O‘shanda “O‘zbekneftgaz” holat yuzasidan izoh bermagan.
2019-yil iyunida Prezident Shavkat Mirziyoyev O‘zbekiston “Lukoyl”dan ichki bozor uchun har ming kub metr gazni 146 dollardan sotib olib, aholiga 40 dollardan sotganini ma’lum qilgan edi. Davlat rahbarining tushuntirishicha, 100 dollarlik farq tufayli 600 million dollarlik qarz vujudga kelgan.
Shuningdek, Prezident mahsulot taqsimotiga oid bitimni tuzishda mamlakat milliy manfaatlari inobatga olinmaganini tanqid qilgan edi.
“Qarzga kelsak, avval ham aytganimdek, bizning, hukumatning asosiy vazifamiz — aholini gaz bilan ta’minlash. Biroq aholiga yetkazib berilayotgan gaz narxi va eksport qilinayotgan gaz narxida katta tafovut mavjud. Shunga qaramay, o‘shanda, zarurat bo‘lganida ‘Lukoyl’dan gaz sotib olingan va ichki bozorga yo‘naltirilgan. Narxdagi katta farq tufayli qarzdorlik vujudga kelgan”, — dedi energetika vaziri o‘rinbosari Behzod Normatov juma kuni bo‘lib o‘tgan matbuot anjumanida.
Uning so‘zlariga ko‘ra, “Lukoyl” bilan kelishilgan sxema bo‘yicha O‘zbekiston o‘z qarzdorligini muntazam qoplab kelmoqda. “Bu muammo emas. Biroq hozir qancha qarz qolgan? Buni aytolmayman”, — deya qo‘shimcha qilgan Behzod Normatov.
“Lukoyl” va O‘zbekiston qarzdorlikni ikki yil muddatda har oy teng miqdordagi to‘lovni amalga oshirish orqali restrukturizatsiya qilish hamda “Lukoyl” mamlakat ichki bozoriga yiliga 5 milliard metr kub miqdoridagi gazni oldindan to‘lov asosida o‘rtacha hisoblangan eksport netbekiga nisbatan 12,5 foizlik chegirma bilan yetkazib berishga kelishib olgan.
Avvalroq Behzod Normatov “Lukoyl” 2020-yilda O‘zbekiston ichki bozoriga taxminan 5 milliard metr kub gazni eksport narxidan past qiymatda yetkazib berganini ma’lum qilgan edi.
Izoh (0)