Тошкентда 70 га яқин жабрланувчига қарийб 1,5 миллиард сўм зарар етказган хусусий бандлик агентлигининг мансабдорларига жазо берилди. Бу ҳақда «Kun.uz» хабар қилган.
2020 йил октябрь ойининг 5 куни жиноят ишлари бўйича Мирзо Улуғбек туман судининг ҳукми билан Жиноят кодексининг 168-моддаси 4-қисми «в» банди (уюшган гуруҳ томонидан ёки унинг манфаатларини кўзлаб содир этилган фирибгарлик), 189-моддаси 1-қисми, 192(11)-моддаси 2-қисми (нодавлат тижорат ташкилотида ёки бошқа нодавлат ташкилотида мансабдор шахслар томонидан ўз ваколатларини суиистеъмол қилиш) «а, б» бандлари ва 227-моддаси 2-қисми «а» бандида назарда тутилган жиноятларни содир этганликда айбланган International experience хусусий бандлик агентлиги МЧЖ директори О.К. ва халқаро алоқалар бўйича менежери Ҳ.К. айбдор деб топилган.
Суд томонидан фирма раҳбари О.К.га (аёл киши) 4 йил 5 ой муддатга озодликдан маҳрум қилиш шартли жазоси тайинланиб, 2 йил синов муддати белгиланган. Шунингдек, унга етказилган моддий зарарни 1 йил 6 ой мобайнида тўлиқ қоплаш мажбурияти юклатилган.
Фирма менежери Ҳ.К.(аёл киши) ташкилий-фармойиш ва маъмурий-хўжалик фаолият юритиш ҳуқуқини берувчи лавозимларда ишлаш ҳуқуқидан 3 йил муддатга маҳрум қилинган ва унга 5 йил-у 1 ой муддатга озодликдан маҳрум этиш жазоси тайинланган.
Суд ҳукми билан 70 га яқин жабрланувчига қарийб 1,5 млрд сўм моддий зарарни тўлаш белгиланган. Айни пайтда тергов органининг депозит ҳисоб рақамида сақланаётган 449 миллион сўм пул етказилган моддий зарарни қоплашга қаратилади.
Мавзуга доир:
- Хусусий бандлик агентликлари томонидан фуқароларни алдаш йўли билан 80 миллиард сўмдан ортиқ маблағ ноқонуний тарзда ўзлаштирилган
- Ўзбекистонда сўнгги 18 ойда лицензияси бекор қилинган хусусий бандлик агентликлари сони 50 тага етди
- Тошкентда 1100 дан ортиқ фуқарони 6,2 млрд сўмга чув туширган хусусий бандлик агентлигининг кирдикорлари фош қилинди
Изоҳ (0)