Xususiy bandlik agentliklari tomonidan fuqarolarni aldash yo‘li bilan 80 milliard so‘mdan ortiq mablag‘ noqonuniy tarzda o‘zlashtirilgan

Xususiy bandlik agentliklari tomonidan uch mingdan ortiq O‘zbekiston fuqarolari 2019–2020-yillarda Yevropa va Osiyoning 10 dan ortiq davlatlariga qonuniy tarzda ishga joylashtirilgan. Biroq ayrim XBAlar tomonidan litsenziya talablari va shartlarini buzish holatlari uchramoqda. Buning natijasida 9 mingdan ortiq fuqarolarni aldash yo‘li bilan 80 milliard so‘mdan ortiq mablag‘lar noqonuniy tarzda o‘zlashtirilgan.

Mazkur holatlarning oldini olish yuzasidan 2020-yil 13-avgustda “Xususiy bandlik agentliklari to‘g‘risida”gi qonunga o‘zgartirish va qo‘shimchalar kiritildi. Ushbu qonun 2020-yilning 13-noyabridan kuchga kirganidan so‘ng vujudga kelishi mumkin bo‘lgan muammolarning oldini olish maqsadida 28-oktabr kuni Bandlik va mehnat munosabatlari vazirligi va XBAlari rahbarlari ishtirokida matbuot anjumani bo‘lib o‘tdi.

“Bugungi kunda 103 ta xususiy bandlik agentligi reyestr ro‘yxatidan o‘tgan bo‘lib, shundan 75 ta XBAlarga vakolatli organ tomonidan belgilangan tartibda litsenziya berilgan va 25 tasi ushbu litsenziya asosida faoliyat yuritmoqda. O‘tgan vaqt oralig‘ida yuqoridagi noxush holatlardan kelib chiqib, 2020-yil 13-avgustda “Xususiy bandlik agentliklari to‘g‘risida”gi qonunga o‘zgartirish va qo‘shimchalar kiritildi va 13-noyabrdan kuchga kiradi”, – dedi bandlik va mehnat munosabatlari vaziri o‘rinbosari Erkin Muhiddinov.

Xususan, ushbu qonunning quyidagi bandlariga o‘zgartirishlar kiritilmoqda:

• O‘zbekiston Respublikasidan tashqaridagi ish qidirayotgan shaxslarga yozma shaklda bildirishnoma berilib, unda ishga joylashtirish bo‘yicha ko‘rsatilgan xizmatlar uchun fuqarolardan haq undirishga yo‘l qo‘yilmasligi to‘g‘risida;
• XBAlar tomonidan shartnoma majburiyatlari bajarilmagan yoki lozim darajada bajarilmagan taqdirda, murojaat qilish uchun xususiy bandlik agentligining hamda Bandlik va mehnat munosabatlari vazirligining pochta manzillari hamda aloqa bog‘lash uchun telefon raqamlari ko‘rsatilishi;
• O‘zbekiston Respublikasidan tashqaridagi ish qidirayotgan shaxslar bilan ish beruvchilar o‘rtasida mehnat shartnomalarini tuzishga ko‘maklashish;
• O‘zbekiston Respublikasidan tashqaridagi ish qidirayotgan shaxslarni ishga joylashtirish bo‘yicha xizmatlarga haq to‘lash ish beruvchining mablag‘lari hisobidan amalga oshiriladi.

Bundan tashqari, XBAlarga o‘z faoliyati haqidagi ma’lumotlarni taqdim etishi, bunda, xizmatlar ko‘rsatish to‘g‘risidagi shartnomalarni Bandlik va mehnat munosabatlar vazirligining www.labormigration.uz axborot tizimida real vaqt rejimida ro‘yxatdan o‘tkazish belgilandi.