Hukumatning “Elektr energetika sohasidagi islohotlarni amalga oshirishda O‘zbekiston budjetini qo‘llab-quvvatlash uchun Osiyo taraqqiyot bankining 200 million AQSh dollari miqdoridagi mablag‘larini jalb qilish to‘g‘risida”gi qarori qabul qilindi, deya xabar qilmoqda Norma.
Moliya vazirligi, Investitsiyalar va tashqi savdo vazirligi, Energetika vazirligi va Osiyo taraqqiyot banki (OTB) o‘rtasida kreditni jalb qilish bo‘yicha memorandum imzolangan. 2020-yil 28-sentabrda OTB direktorlar kengashi tomonidan elektr energetika sohasidagi islohotlarni amalga oshirishda O‘zbekiston budjetini qo‘llab-quvvatlash uchun 15 yil muddatga qarz ajratilishi ma’qullangan.
“O‘zbekiston Respublikasida elektr energiyasini hisobga olish va nazorat qilishning avtomatlashtirilgan tizimini joriy etish” investitsiya loyihasining umumiy qiymati 457,8 million AQSh dollarini tashkil etadi. Loyihaning texnik-iqtisodiy asoslanuvi Moliya vazirligi hamda Investitsiyalar va tashqi savdo vazirligi tomonidan ma’qullangan.
Loyiha quyidagi mablag‘lar hisobiga amalga oshiriladi:
- 91,3 million AQSh dollari – “Hududiy elektr tarmoqlari” AJ;
- 250 million AQSh dollari – Moliya vazirligi krediti;
- 20,5 million AQSh dollari – OTB krediti;
- 62,6 million AQSh dollari – “O‘zsanoatqurilishbank” krediti;
- 33,3 million AQSh dollari – Rivojlanish jamg‘armasi.
OTB tomonidan ajratilgan va O‘zbekiston budjeti xarajatlarini moliyalashtirish uchun mo‘ljallangan kredit 6 oylik libor + 0,5 foiz stavka bilan 200 million AQSh dollarini tashkil etadi. Kreditni so‘ndirish, ular bo‘yicha foizlar, majburiyat uchun to‘lovlarni to‘lash bilan bog‘liq xarajatlar O‘zbekistonning respublika budjeti mablag‘lari hisobidan amalga oshiriladi.
Qabul qilingan hujjat bilan quyidagilar tasdiqlandi:
- “O‘zbekiston Respublikasida elektr energiyasini hisobga olish va nazorat qilishning avtomatlashtirilgan tizimini joriy etish” investitsiya loyihasi TIA asosiy texnik-iqtisodiy ko‘rsatkichlari;
- Elektr energetika sohasidagi islohotlarni amalga oshirishda O‘zbekiston budjetini qo‘llab-quvvatlash uchun jalb etilayotgan OTB qarzini so‘ndirish, foiz va vositachilik to‘lovlarini to‘lashning prognoz jadvali.
Izoh (0)