Energetika vaziri o‘rinbosari Behzod Normatov 1-noyabrdan avtomobillarni gaz bilan to‘ldirish kompressor stansiyalari (AGTKS) kuz-qish mavsumiga o‘tishi munosabati bilan ular faoliyatida cheklovlar joriy qilinishi bo‘yicha tarqalgan xabarlarga izoh berdi, deb yozmoqda “Kun.uz”.
“Asosiy vazifamiz – birinchi navbatda aholini, ijtimoiy sohani gaz bilan ta’minlash. Cheklovlar deganda biz ularning kunlik yoki oylik sotish hajmlariga cheklov qo‘yayotganimiz yo‘q. Avvallari har bir AGTKSga limit qo‘yilardi. Ya’ni ular bir oyda 500-1000 metr kub gazdan ko‘p sota olmasdi. Yigirma kunda sotib bo‘lsa, undan keyin qimmatroq narxdan to‘lab, limitdan tashqari hajmlarni sotib olish imkoniyatiga ega bo‘lardi.
Endi ularda hajm bo‘yicha cheklov bo‘lmaydi. Gazga talab ko‘payadigan paytda, masalan, hamma uyga qaytib kelib, ovqat qilish, uylarini isitish, suv isitishga gaz yetkazib berish uchun tizimdagi gaz hajmini bir maromda qilib berishimiz kerak.
Muayyan tarmoqlarda aholiga ketgan tarmoqlarda ishlab chiqaruvchilar va AGTKSlar ko‘p ulangan joylari mavjud. Toshkentni oladigan bo‘lsak, Toshkent halqa quvurlar tizimi bor, bu tizim aholiga tarqatish uchun qilingan tizim bo‘lgan. Kelajakda bunchalik ko‘p AGTKS qurilishi inobatga olinmagan.
Hozirgi kunga kelib, respublikada mingga yaqin avtomobillarga kompressorda gaz siqib berib quyish shoxobchalari mavjud, bu MDH davlatlari misolida olinadigan bo‘lsa, son bo‘yicha ham eng ko‘plaridan biri”, — degan Behzod Normatov.
Shuningdek, vazir o‘rinbosari mazkur tizimni yo‘lga qo‘yish bo‘yicha bir to‘xtamga kelinmaganini aytib o‘tgan.
“Hozir o‘ylab chiqyapmiz: tizim bir me’yorda ishlashi uchun gazni ishlatish hajmi oshib ketgan davrlarda kompressor stansiyalarini ma’lum bir vaqtga, 4 yoki 5 soatga o‘chirib turish, shu paytda aholiga mavjud bo‘lgan quvurlar orqali bir me’yorda yetib borishini ta’minlash mumkin.
Texnik va texnologik shartlardan kelib chiqib, shu vaqtga kamaytirib turadigan bo‘lsak, preferensiyalar berilmasdan, shuni odilona, respublika bo‘yicha hammaga qiladigan bo‘lsak, hozirda quvurlarda bor gaz hammaga, eng chekkadagi iste’molchiga yetib borishini ham ta’minlab bergan bo‘lamiz”, — deydi vazir o‘rinbosari.
Behzod Normatov bu borada hali bir to‘xtamga kelinmaganini ta’kidlagan. Bunga sabab sifatida mahalliy hokimiyat bilan kelishish va joylarda chiqib o‘rganishlar o‘tkazish, o‘zaro kelishib olish kerakligini ta’kidlagan.
Eslatib o‘tamiz, oldinroq Toshkentdagi tadbirkorlar gaz ta’minoti organi xodimlaridan 1-noyabrdan boshlab gaz uzatilishi o‘chirib qo‘yilishi to‘g‘risida ogohlantirish olayotgani ma’lum bo‘lgan. Energetika vazirligi tabiiy gazdan foydalanishiga doir bu kabi cheklovlarni “zarur chora” deb atagan. Keyinchalik Energetika vazirligi avtomobillarga gaz quyish kompressor shoxobchalariga (AGQKSh) gaz yetkazib berish shartlari ko‘rib chiqilayotganligini ma’lum qilgan.
Izoh (0)