Энергетика вазири ўринбосари Беҳзод Норматов 1 ноябрдан автомобилларни газ билан тўлдириш компрессор станциялари (АГТКС) куз-қиш мавсумига ўтиши муносабати билан улар фаолиятида чекловлар жорий қилиниши бўйича тарқалган хабарларга изоҳ берди, деб ёзмоқда «Kun.uz».
«Асосий вазифамиз – биринчи навбатда аҳолини, ижтимоий соҳани газ билан таъминлаш. Чекловлар деганда биз уларнинг кунлик ёки ойлик сотиш ҳажмларига чеклов қўяётганимиз йўқ. Авваллари ҳар бир АГТКСга лимит қўйиларди. Яъни улар бир ойда 500-1000 метр куб газдан кўп сота олмасди. Йигирма кунда сотиб бўлса, ундан кейин қимматроқ нархдан тўлаб, лимитдан ташқари ҳажмларни сотиб олиш имкониятига эга бўларди.
Энди уларда ҳажм бўйича чеклов бўлмайди. Газга талаб кўпаядиган пайтда, масалан, ҳамма уйга қайтиб келиб, овқат қилиш, уйларини иситиш, сув иситишга газ етказиб бериш учун тизимдаги газ ҳажмини бир маромда қилиб беришимиз керак.
Муайян тармоқларда аҳолига кетган тармоқларда ишлаб чиқарувчилар ва АГТКСлар кўп уланган жойлари мавжуд. Тошкентни оладиган бўлсак, Тошкент ҳалқа қувурлар тизими бор, бу тизим аҳолига тарқатиш учун қилинган тизим бўлган. Келажакда бунчалик кўп АГТКС қурилиши инобатга олинмаган.
Ҳозирги кунга келиб, республикада мингга яқин автомобилларга компрессорда газ сиқиб бериб қуйиш шохобчалари мавжуд, бу МДҲ давлатлари мисолида олинадиган бўлса, сон бўйича ҳам энг кўпларидан бири», — деган Беҳзод Норматов.
Шунингдек, вазир ўринбосари мазкур тизимни йўлга қўйиш бўйича бир тўхтамга келинмаганини айтиб ўтган.
«Ҳозир ўйлаб чиқяпмиз: тизим бир меъёрда ишлаши учун газни ишлатиш ҳажми ошиб кетган даврларда компрессор станцияларини маълум бир вақтга, 4 ёки 5 соатга ўчириб туриш, шу пайтда аҳолига мавжуд бўлган қувурлар орқали бир меъёрда етиб боришини таъминлаш мумкин.
Техник ва технологик шартлардан келиб чиқиб, шу вақтга камайтириб турадиган бўлсак, преференсиялар берилмасдан, шуни одилона, республика бўйича ҳаммага қиладиган бўлсак, ҳозирда қувурларда бор газ ҳаммага, энг чеккадаги истеъмолчига етиб боришини ҳам таъминлаб берган бўламиз», — дейди вазир ўринбосари.
Беҳзод Норматов бу борада ҳали бир тўхтамга келинмаганини таъкидлаган. Бунга сабаб сифатида маҳаллий ҳокимият билан келишиш ва жойларда чиқиб ўрганишлар ўтказиш, ўзаро келишиб олиш кераклигини таъкидлаган.
Эслатиб ўтамиз, олдинроқ Тошкентдаги тадбиркорлар газ таъминоти органи ходимларидан 1 ноябрдан бошлаб газ узатилиши ўчириб қўйилиши тўғрисида огоҳлантириш олаётгани маълум бўлган. Энергетика вазирлиги табиий газдан фойдаланишига доир бу каби чекловларни «зарур чора» деб атаган. Кейинчалик Энергетика вазирлиги автомобилларга газ қуйиш компрессор шохобчаларига (АГҚКШ) газ етказиб бериш шартлари кўриб чиқилаётганлигини маълум қилган.
Изоҳ (0)