“Tottenhem” sobiq bosh murabbiyi Maurisio Pochettino “Manchester Yunayted”da ish boshlash uchun ikki bor “Barselona” taklifini rad etgan, deya xabar qilmoqda Daily Star.
Manbaga ko‘ra, katalonlar ikki marta argentinalik mutaxassisga jamoa bosh murabbiyligini taklif qilgan, biroq Pochettino ularga rad javobini bergan.
Avvalroq 48 yoshli mutaxassis “Manchester Yunayted”da Ole-Gunnar Sulsherning o‘rinini egallashi mumkin bo‘lgan da’vogarlar ro‘yxatida ekani xabar qilingandi. Maurisio 2019-yilning dekabridan beri mankunianlar ustoziga aylanish maqsadida ekani va bu qarori hali ham o‘zgarmagani aytilgandi.
Pochettino 2014—2019-yillar mobaynida “Tottenhem”da ishlagan. Undan avval “Sauthempton” va “Espanyol” jamoalarida faoliyat yuritgan. U “shporlar” bilan Chempionlar Ligasi va Angliya Liga Kubogi finallariga qadar yetib borgan, biroq birorta ham sovrin yuta olmagan.
Mutaxassis Kataloniyaning boshqa jamoasi “Espanyol”da ishlab yurgan vaqtida hech qachon “Barselona” ustoziga aylanmasligini ma’lum qilgandi. Ayni vaqtda katalon klubini Ronald Kuman boshqarib bormoqda.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)