Barcha “GAZ-14” limuzinlari mutlaqo qora rangga bo‘yalgan. Faqatgina bittasidan — eng birinchi nusxadan tashqari. 000001 tartib raqamiga va olcharang kuzovga ega “Chayka” Sovet Ittifoqi Kommunistik partiyasi (KPSS) Markaziy qo‘mitasi bosh kotibi Leonid Brejnevga 70 yillik yubileyida sovg‘a qilingan, deb xabar beradi CARakoom.
Birinchi “Chayka” mazkur qo‘mitada uzoq vaqt xizmat qilgan, shundan so‘ng u partiyaning Yaroslavl shahri organlariga topshirilgan, undan keyin esa avtomobil xususiy qo‘llarga tushgan.
Mashina bir necha marotaba qo‘ldan qo‘lga o‘tgan va oxir-oqibat Germaniyaga borib qolgan. Hozirda ushbu model 9 million rubl narxida sotuvga qo‘yilgan.
“GAZ-14” limuzini hozirga qadar 72 588 kilometr yo‘l bosgan. Suratlarga ko‘ra, avtomobil deyarli ideal holatda saqlangan. Kuzov, xrom, salon — barchasi yangidek.
Ushbu avtomobilni bir necha yildan buyon sotishga urinishmoqda. Yevropa valyutasidagi narxi o‘zgarishsiz qolmoqda — 120 ming yevro. Rubldagi qiymati esa muntazam oshib boryapti. 2019-yilda uning qiymati 8,3 million rubl ekvivalentga teng edi.
“Chayka”lar 1977-yildan 1988-yilga qadar ishlab chiqarilgan bo‘lib, bu vaqt oralig‘ida zavoddan 1414 nusxa chiqqan. Shundan so‘ng “imtiyozlarga qarshi kurash” doirasida avtomobil Gorbachyovning buyrug‘i bilan ishlab chiqarishdan olingan. Shu bilan birga, barcha texnologik uskunalar, ishchi hujjatlar, yig‘ish liniyalari, kuzov shtamplari va boshqa kerakli jihozlar yo‘q qilingan.
Avvalroq AQShning 33-prezidentiga tegishli bo‘lgan Lincoln limuzini auksionga qo‘yilgani to‘g‘risida xabar berilgandi.
Izoh (0)