“O‘ztransgaz” AJ tomonidan foydalanishda bo‘lgan xavfli ishlab chiqarish obyektlarida jami 31 marotaba nazorat profilaktika ishlari amalga oshirilgan. Bu haqda Bu haqda Sanoat xavfsizligi davlat qo‘mitasi axborot xizmati “Daryo”ga ma’lum qildi.
Qo‘mita tomonidan “O‘ztransgaz” AJ tomonidan foydalanishda bo‘lgan xavfli ishlab chiqarish obyektlarida jami 31 marotaba nazorat profilaktika ishlari amalga oshirilgan. Aniqlangan 426 ta kamchiliklardan 403 tasi bartaraf etilib, qolganlari ijrosi nazoratga olingan.
“Gazni taqsimlash stansiyalari va gazni rostlash punktlarining texnik holatini aniqlash maqsadida qo‘mita tomonidan malakali mutaxassislar ajratilgan. Gazni taqsimlash stansiyalari va gazni rostlash punktlarining texnik holatini yaxshilash maqsadida xatlovdan o‘tkazish bo‘yicha ishlar “O‘ztransgaz” AJ tomonidan tashkillashtirilmaganligi sababli ushbu ishlar amalga oshirilmadi”, – deyiladi qo‘mita axborotida.
Qo‘mita axborotida aytilishicha, 2020-yilning 9 oyi davomida “O‘ztransgaz” AJ tasarrufidagi magistral gaz quvurlarida 3 ta avariya sodir bo‘lgan. Avariyalarni bartaraf etish va magistral gaz quvurlarni ta’mirlash uchun jami 2 milliard so‘mdan ortiq mablag‘lar sarf qilindi. Avariyalarni tekshirish natijalari bo‘yicha hujjat va ko‘rsatmalar taalluqli vazirlik va idoralarga kiritilgan.
“O‘ztransgaz” AJning elektr-kimyoviy himoya vositalarini bosqichma-bosqich tiklash bo‘yicha “2020-yilda ‘O‘ztransgaz’ AJ qarashli magistral gaz quvurlari boshqarmalaridagi magistral gaz quvurlarini yerosti korroziyasidan himoyalanganligini oshirish bo‘yicha kompleks chora-tadbirlar” ishlab chiqilgan. Ushbu rejaga muvofiq bajarilishi lozim bo‘lgan ishlar 1-oktyabr holatiga ko‘ra o‘rganilganda atigi 42 ta (rejada 245 ta) katod himoya stansiyalari va 31 ta (rejada 301 ta) chuqur anodli yerlatgichlar tiklangani aniqlangan.
Shuningdek, “O‘ztransgaz” AJ tomonidan Vazirlar Mahkamasining “Xavfli ishlab chiqarish obyektlarining sanoat xavfsizligi to‘g‘risida”gi O‘zbekiston Respublikasi qonunini amalga oshirishga doir qo‘shimcha chora-tadbirlar to‘g‘risida”gi 291-son qarori talablari bajarilmagan. Ya’ni jamiyat xavfli ishlab chiqarish obyektlari xavfli ishlab chiqarish obyektlari davlat reyestriga kiritilmagan hamda xavfli ishlab chiqarish obyektida sanoat xavfsizligi talablariga rioya etilishi ustidan ishlab chiqarish nazorati o‘rnatilmagan.
Izoh (0)