«Ўзтрансгаз»нинг магистрал газ қувурларида содир бўлган 3 та авария оқибатларини бартараф этишга 2 миллиард сўмдан ортиқ маблағ сарфланди

«Ўзтрансгаз» АЖ томонидан фойдаланишда бўлган хавфли ишлаб чиқариш объектларида жами 31 маротаба назорат профилактика ишлари амалга оширилган. Бу ҳақда Бу ҳақда Саноат хавфсизлиги давлат қўмитаси ахборот хизмати «Дарё»га маълум қилди.

Қўмита томонидан «Ўзтрансгаз» АЖ томонидан фойдаланишда бўлган хавфли ишлаб чиқариш объектларида жами 31 маротаба назорат профилактика ишлари амалга оширилган. Аниқланган 426 та камчиликлардан 403 таси бартараф этилиб, қолганлари ижроси назоратга олинган.

«Газни тақсимлаш станциялари ва газни ростлаш пунктларининг техник ҳолатини аниқлаш мақсадида қўмита томонидан малакали мутахассислар ажратилган. Газни тақсимлаш станциялари ва газни ростлаш пунктларининг техник ҳолатини яхшилаш мақсадида хатловдан ўтказиш бўйича ишлар «Ўзтрансгаз» АЖ томонидан ташкиллаштирилмаганлиги сабабли ушбу ишлар амалга оширилмади», – дейилади қўмита ахборотида.

Қўмита ахборотида айтилишича, 2020 йилнинг 9 ойи давомида «Ўзтрансгаз» АЖ тасарруфидаги магистрал газ қувурларида 3 та авария содир бўлган. Аварияларни бартараф этиш ва магистрал газ қувурларни таъмирлаш учун жами 2 миллиард сўмдан ортиқ маблағлар сарф қилинди. Аварияларни текшириш натижалари бўйича ҳужжат ва кўрсатмалар тааллуқли вазирлик ва идораларга киритилган.

«Ўзтрансгаз» АЖнинг электр-кимёвий ҳимоя воситаларини босқичма-босқич тиклаш бўйича «2020 йилда ‘Ўзтрансгаз’ АЖ қарашли магистрал газ қувурлари бошқармаларидаги магистрал газ қувурларини ерости коррозиясидан ҳимояланганлигини ошириш бўйича комплекс чора-тадбирлар» ишлаб чиқилган. Ушбу режага мувофиқ бажарилиши лозим бўлган ишлар 1-октябр ҳолатига кўра ўрганилганда атиги 42 та (режада 245 та) катод ҳимоя станциялари ва 31 та (режада 301 та) чуқур анодли ерлатгичлар тиклангани аниқланган.

Шунингдек, «Ўзтрансгаз» АЖ томонидан Вазирлар Маҳкамасининг «Хавфли ишлаб чиқариш объектларининг саноат хавфсизлиги тўғрисида»ги Ўзбекистон Республикаси қонунини амалга оширишга доир қўшимча чора-тадбирлар тўғрисида»ги 291-сон қарори талаблари бажарилмаган. Яъни жамият хавфли ишлаб чиқариш объектлари хавфли ишлаб чиқариш объектлари давлат реестрига киритилмаган ҳамда хавфли ишлаб чиқариш объектида саноат хавфсизлиги талабларига риоя этилиши устидан ишлаб чиқариш назорати ўрнатилмаган.