Kadastr sohasida qaysi omillar tufayli korrupsion holatlar avj olayotgani ma’lum qilindi

Kadastr sohasida tanish-bilishchilik, mahalliychilik avj olgan bo‘lib, tizimdagi kadrlarni ishda olib qolish uchun yetarli shart-sharoit yaratib berilmagan. Shu bois sohada yuqori malakali kadrlarning qo‘nimsizligi, korrupsion holatlar ko‘payib ketgan. Bu haqda 5-noyabr kuni AOKAda o‘tkazilgan matbuot anjumanida ma’lum qilindi, deya xabar bermoqda “Daryo” muxbiri Mirolim Isajonov.

“Yer umumxalq boyligi hisoblanadi. Shuning uchun ham bu sohadagi korrupsiyani yo‘qotish, bartaraf qilish xalqimiz manfaati yo‘lidagi eng asosiy vazifalardan biridir. Mazkur sohada korrupsiya yaqinda paydo bo‘lgan emas. Ochig‘ini aytish kerak, yer bilan bog‘liq korrupsiya faqat kadastrchilar tomonidan sodir etiladi, deyish adolatsizlik bo‘ladi. Chunki hokimlarning qarorisiz bir qarich yerni tasarruf qilib bo‘lmaydi”, — dedi agentlik vakili.

Mirmaqsudov korrupsiyaning oldini olishdan avval uni keltirib chiqarayotgan sabablarni aniqlash kerakligi haqida gapirarkan, sohada korrupsiyaning avj olib ketishiga bir qancha omillar ta’sir ko‘rsatayotganini ta’kidladi.

“Birinchisi, malakali kadrlarning yetishmasligi. Malakali kadrlarni jalb qilish uchun esa tizimda mablag‘ yetarli emas. Mavjud mablag‘lardan samarali foydalanishning yo‘lga qo‘yilmaganligi, tanish-bilishchilik, mahalliychilik avj olganligi, korrupsiyaning oldini olish bo‘yicha uzoq muddatli va aniq strategiyaning yo‘qligini misol qilib keltirishimiz mumkin. Asosiysi, malakali kadrlarning yetishmasligi og‘riqli nuqtamizdir. Tizimdagi kadrlarni sohada ushlab qolish uchun yetarli shart-sharoit yaratib, yaxshigina oylik maosh belgilab berish lozim. Kadastr muhandislarining hozirgi paytgacha o‘rtacha oylik maoshi miqdori 900 ming-bir million 100 ming so‘m atrofida bo‘lgan. Shu sababli sohada yuqori malakali kadrlarning qo‘nimsizligi avj olgan.

Yuqoridagi holatlardan kelib chiqib, korrupsiyaning oldini olish maqsadida hududiy Yer resurslari va davlat kadastri boshqarmasi xodimlari hamda yer nazoratchi inspektorlari oylik maoshlariga qo‘shimcha ravishda agentlikning “Budjetdan tashqari jamg‘armasi” mablag‘lari hisobidan har oyda 100 foizlik ustamalar hamda ovqat va yo‘l puli berilishi belgilandi. Bunda xodimning oylik ish haqqi miqdoriga o‘rtacha 1,5 million so‘mdan ikki million so‘mgacha qo‘shimcha mablag‘ qo‘shiladi. Keyinchalik oylik maoshni yana bosqichma-bosqich ko‘tarish rejalashtirilmoqda”, — dedi Mirsaid Mirmaqsudov.