Кадастр соҳасида таниш-билишчилик, маҳаллийчилик авж олган бўлиб, тизимдаги кадрларни ишда олиб қолиш учун етарли шарт-шароит яратиб берилмаган. Шу боис соҳада юқори малакали кадрларнинг қўнимсизлиги, коррупцион ҳолатлар кўпайиб кетган. Бу ҳақда 5 ноябрь куни АОКАда ўтказилган матбуот анжуманида маълум қилинди, дея хабар бермоқда «Дарё» мухбири Миролим Исажонов.
«Ер умумхалқ бойлиги ҳисобланади. Шунинг учун ҳам бу соҳадаги коррупцияни йўқотиш, бартараф қилиш халқимиз манфаати йўлидаги энг асосий вазифалардан биридир. Мазкур соҳада коррупция яқинда пайдо бўлган эмас. Очиғини айтиш керак, ер билан боғлиқ коррупция фақат кадастрчилар томонидан содир этилади, дейиш адолатсизлик бўлади. Чунки ҳокимларнинг қарорисиз бир қарич ерни тасарруф қилиб бўлмайди», — деди агентлик вакили.
Мирмақсудов коррупциянинг олдини олишдан аввал уни келтириб чиқараётган сабабларни аниқлаш кераклиги ҳақида гапираркан, соҳада коррупциянинг авж олиб кетишига бир қанча омиллар таъсир кўрсатаётганини таъкидлади.
«Биринчиси, малакали кадрларнинг етишмаслиги. Малакали кадрларни жалб қилиш учун эса тизимда маблағ етарли эмас. Мавжуд маблағлардан самарали фойдаланишнинг йўлга қўйилмаганлиги, таниш-билишчилик, маҳаллийчилик авж олганлиги, коррупциянинг олдини олиш бўйича узоқ муддатли ва аниқ стратегиянинг йўқлигини мисол қилиб келтиришимиз мумкин. Асосийси, малакали кадрларнинг етишмаслиги оғриқли нуқтамиздир. Тизимдаги кадрларни соҳада ушлаб қолиш учун етарли шарт-шароит яратиб, яхшигина ойлик маош белгилаб бериш лозим. Кадастр муҳандисларининг ҳозирги пайтгача ўртача ойлик маоши миқдори 900 минг-бир миллион 100 минг сўм атрофида бўлган. Шу сабабли соҳада юқори малакали кадрларнинг қўнимсизлиги авж олган.
Юқоридаги ҳолатлардан келиб чиқиб, коррупциянинг олдини олиш мақсадида ҳудудий Ер ресурслари ва давлат кадастри бошқармаси ходимлари ҳамда ер назоратчи инспекторлари ойлик маошларига қўшимча равишда агентликнинг «Бюджетдан ташқари жамғармаси» маблағлари ҳисобидан ҳар ойда 100 фоизлик устамалар ҳамда овқат ва йўл пули берилиши белгиланди. Бунда ходимнинг ойлик иш ҳаққи миқдорига ўртача 1,5 миллион сўмдан икки миллион сўмгача қўшимча маблағ қўшилади. Кейинчалик ойлик маошни яна босқичма-босқич кўтариш режалаштирилмоқда», — деди Мирсаид Мирмақсудов.
Мавзуга доир:
- Шавкат Мирзиёев раислигида ўтказилган йиғилишда ер ажратиб бериш эвазига пора олган ҳокимлик ходимлари ҳақида маълумот берилди
- Шавкат Мирзиёев ер ҳисоби ва давлат кадастрларини самарали юритиш масалалари бўйича йиғилиш ўтказди
- Кадастр соҳасида рақамлаштирилган интеграция жараёнлари жорий қилинмоқда. Бу тизим бизга нима беради?
Изоҳ (0)