Davlat statistika qo‘mitasi so‘nggi yillar davomida ilk bor O‘zbekistonda yanvar—sentabr oylarida kuzatilgan o‘lim holatlari statistikasini demografik holat to‘g‘risidagi choraklik hisobotiga kiritmadi.
Davlat statistika qo‘mitasining shu kabi hisobotlarida birinchi chorak (yanvar—mart) va birinchi yarim yillikda (yanvar—iyun) kuzatilgan o‘lim holatlari to‘g‘risidagi ma’lumotlar aks ettirilgan. O‘lim holatlari statistikasi undan oldingi hisobotlarda ham mavjud.
“Gazeta.uz”ning qo‘mitaga tayanib yozishicha, o‘lim holatlari statistikasini shakllantirish uchun mas’ul bo‘lgan Adliya vazirligi va Sog‘liqni saqlash vazirligi ma’lumotlarni Davlat statistika qo‘mitasiga taqdim etmagan. Shu o‘rinda Adliya vazirligi esa Davlat statistika qo‘mitasida barcha ma’lumotlar mavjudligini aytgan. Sog‘liqni saqlash vazirligi so‘rovga javob bermagan.
Nashrning Davlat statistika qo‘mitasidagi manbalarining ma’lum qilishicha, oylik o‘lim holatlari statistikasi har keyingi oyning ilk 15 kuni ichida tuziladi. Masalan, sentabr oyi statistikasi 15-oktabrgacha, oktabr uchun esa 15-noyabrgacha tayyor bo‘lishi kerak. Avgust va sentabr oylaridagi o‘lim ko‘rsatkichlari to‘g‘risidagi bir nechta so‘rovlarga javoban qo‘mita mas’ul vazirliklarning hali ham ma’lumot yubormaganliklari haqida xabar qilgan.
Ma’lumot uchun, O‘zbekistonda koronavirus pandemiyasi sababli o‘lganlar soni iyul oyida 26,4 foizga, Toshkent shahrida esa 2,6 martaga oshgan.
Izoh (0)