O‘zbekistonda dam olish kunidan sovuq tushib, yomg‘ir yog‘ishi kutilmoqda

O‘zbekiston hududi 6—7-noyabr kunlari issiq janubi-g‘arbiy havo oqimlari ta’sirida bo‘ladi, deb xabar bermoqda “O‘zgidromet”.

Respublika hududining katta qismida ob-havo kam bulutli bo‘ladi, harorat iqlimiy me’yordan 4-6 darajaga yuqori bo‘ladi. Kunduzi harorat 22-27 daraja, kechasi 4-9 daraja atrofida bo‘ladi.

Yakshanba, 8-noyabr kuni respublika hududiga Kavkaz tomondan sovuq va nam havo oqimi kira boshlaydi. Kun davomida ushbu oqim respublikaning shimoli-g‘arbiy tumanlariga tarqaladi. Kechga borib u O‘zbekistonning markaziy tumanlariga o‘tadi.

Ushbu jarayonda respublika bo‘yicha bulutlilik ortadi, Qoraqalpog‘istonda, Xorazm, Buxoro, Navoiy viloyatlarida ayrim joylarga yomg‘ir yog‘adi. 8-noyabrda kechasi va 9-noyabr ertalab mamlakatning markaziy va janubi-sharqiy tumanlarida yomg‘ir yog‘adi. Tog‘li hududlarda yomg‘irning qorga aylanish ehtimoli bor, ayrim joylarda yog‘ingarchilik kuchli bo‘lishi mumkin.

Yakshanba kuni kunduzi harorat biroz pasayadi. Respublika hududining katta qismda harorat 15-20 daraja, shimolda 8-13 daraja bo‘ladi. Keyingi haftaning boshida esa sovuq tushadi, tungi harorat 0-5 daraja iliq, kunduzi 10-15 daraja bo‘ladi.