BMW компанияси ўзининг iХ3 электромобилини тақдим этди

BMW компанияси Европада Хитойдаги дилерлик марказидан олиб келинадиган iХ3 электр йўлтанламасини тақдим этди, деб ёзади IXBT.

Ушбу моделнинг концептуал прототипи 2018 йилда тақдим этилган эди. Ўшанда немис автомобилсозлик компанияси бу бешинчи авлод электр трансмиссиясига эга илк транспорт воситасига айланишини ваъда қилганди. Шунингдек, бу BMW’нинг 2013 йилдан буён илк тўлиқ электроавтомобилига айланган. Бундан ташқари, iХ3 модели BMW’нинг Хитойда ясалиб, бошқа мамлакатларга экспорт қилинадиган илк электромобили ҳамдир.

Электромобилга ўрнатилган сиғими 74 кВТ/соатга тенг аккумулятор батареялари WLTP тести бўйича унинг 460 километр йўл босишини таъминлайди, бу эса реал шароитдаги йўлларда тахминан 300 километрга тенг. Аккумулятор батареяси 286 от кучига эга электродвигателни қувватлантиради. Унинг ёрдамида машина соатига 100 километр тезликка 6,8 сонияда эришиши мумкин. Қуввати 150 кВтга тенг зарядлаш қурилмаси ёрдамида тезкор қувватланиш функцияси ҳам мавжуд.

BMW iХ3’ни йиғиш сентябрь ойида бошланган. Илк машиналар Европадаги дилерларга яқин кунлар ичида етиб келади. Янги машинанинг нархи 70 минг евро.

Эслатиб ўтамиз, сентябрь ойи бошларида BMW компанияси 2030 йилда ҳавога нол миқдорда зарарли газ чиқарадиган тўққиз моделни электрификация қилишга оид режаси билан бўлишганди.