“Andijon” futbol klubida yana bosh murabbiy almashdi. Bu mavsumdagi 3-tayinlov

“Andijon” futbol klubi ustozi Baxtiyor Hamidullayev iste’foga chiqarildi va uning o‘rniga yangi bosh murabbiy tayinlandi.

“Andijon” matbuot xizmatining ma’lum qilishicha, jamoani bundan keyin Otabek G‘ulomxo‘jayev boshqarib boradi.

G‘ulomxo‘jayev 2015–2016-yillarda O‘zbekiston U-16 terma jamoasida yordamchi murabbiy sifatida ish yuritgan. 2018–2019-yillarda esa O‘zbekiston U-19 terma jamoasiga ustozlik qilgan. Mutaxassis U-19 Osiyo Chempionati saralash bosqichi doirasida Saudiya Arabistoni (U-19) terma jamoasiga qarshi o‘yindagi harakatlari uchun OFK talabiga binoan O‘FA tomonidan iste’foga chiqarilgandi. Keyinchalik murabbiy “Navbahor” klubida seleksioner murabbiy sifatida faoliyat yuritdi.

G‘ulomxo‘jayev 2001–2002-yillarda “Andijon” jamoasida to‘p surgan.

Ma’lumot uchun, “Andijon” 2020-yilgi mavsum hisobidan uchinchi marta murabbiy almashtirdi. Mavsumni Andrey Miklyayev qo‘l ostida boshlagan jamoa qoniqarsiz natijalar sabab murabbiyni ishdan oldi va uning o‘rniga Viktor Kumikovni jalb qildi. Keyinchalik rossiyalik mutaxassis o‘rnini Baxtiyor Hamidullayev egallagandi.