“Agar yordam berolmasangiz, xalaqit ham qilmang!” – Sherzod Shermatov hokimlarga murojaat qildi

O‘zbekiston xalq ta’limi vaziri Sherzod Shermatov Facebook ijtimoiy tarmog‘ida mamlakatning turli joylaridan o‘qituvchilarni so‘rov o‘tkazishga jalb qilish va aholini ro‘yxatga olish to‘g‘risida xabarlarning skrinshotlarini joylashtirdi.

“Mamlakatda pandemiya mavjud. Deyarli har bir selektorda davlat rahbari tashkilot rahbarlarini COVID-19 haqida ogohlantiradi, o‘zlariga va oilalariga g‘amxo‘rlik qilishni qayta-qayta so‘raydi. Xo‘sh, Farg‘ona viloyatidagi 28-maktab direktori o‘qituvchi va murabbiylarni mahallalarga borishi va ularning vazifalariga umuman tegishli bo‘lmagan so‘rovnoma o‘tkazishi to‘g‘ri deb hisoblash mumkinmi?” – deyiladi murojaatlarning birida.

Gap qo‘llab-quvvatlashga muhtoj odamlarni o‘z ichiga olgan “temir”, “ayollar” va “yoshlar” daftarlari haqida ketmoqda.

“Men Andijondanman. Bunga kim ko‘rsatma berganini bilmayman, lekin uyga borish, har bir oila a’zosidan ma’lumotlarni to‘plash, ularning ism-shariflari, pasportlari, oilaviy ahvoli, turmush darajasi, ish joyini bilish kimning zimmasida? Bundan nima foyda? Bu ish kimning zimmasida?”, – deyiladi boshqa xabarda.

Sherzod Shermatov ba’zi mahalliy amaldorlar o‘zlarining hozirgi muammosini hal qilishga urinib, “Prezident siyosatiga xiyonat qilayotganliklarini” tushunmayotganlarini bildirdi.

“Prezident bu yil birinchi bor O‘qituvchi va murabbiylar kunida o‘zi chiqib tabrik so‘zi bilan murojaat qildi. Ta’lim-tarbiya tizimini yaxshilash bo‘yicha farmon loyihasini tayyorlash bo‘yicha topshiriq berdi, keyin yana qo‘shimcha selektor o‘tkazib, har bir hokim endi kamida 30-40 foiz vaqtini maktabga yordam berishga qaratsin deb aytdi va hurmatli hokimlarimizdan bu masalaga chin dildan yondashishni, kundalik topshiriq sifatida qabul qilmaslikni so‘radi. Kuni kecha farmonga imzo qo‘yishdan oldin yana bir bor ta’limni ko‘tarish muhimligini qat’iy ta’kidladi. Bugun ertalabdan esa joylardan shunday yangiliklarni o‘qib turibmiz...”, – dedi vazir.

Uning so‘zlariga ko‘ra, o‘qituvchilarni majburiy mehnatga jalb qilishning bunday holatlariga nafaqat Prezident siyosatiga xiyonat, balki davlat rahbarini obro‘sizlantirishga qaratilgan qasddan qilingan urinish sifatida ham qarash kerak.

Agar kerak bo‘lsa, mahalliy mansabdor shaxslar har bir bunday holat uchun jinoiy javobgarlikka tortilishi kerak, deb hisoblaydi xalq ta’limi vaziri.

“Hurmatli hokimlar va sektor rahbarlaridan xalq ta’limi tizimi xodimlarini faqat ta’lim sifati bo‘yicha ishlashlariga sharoit yaratishda yordam berishingizni so‘raymiz! Yordam berishga imkoniyatingiz bo‘lmasa, iltimos, juda bo‘lmasa xalaqit qilmang!” – deb yozadi Sherzod Shermatov.

Uning qo‘shimcha qilishicha, bunday qo‘shimcha ishlarga Mehnat vazirligidagi alohida fonddan mablag‘ olib joylardagi ishsizlarni jalb qilsa bo‘ladi.

Avvalroq Monopoliyaga qarshi kurashish qo‘mitasi maktablarni jihozlashdagi monopoliyaga qarshi chiqqan edi.