Qishloq xo‘jaligi mashinalarining yangi namunalarini yaratish, ularni ishlab chiqarishga joriy etish va sohani istiqbolli rivojlantirish bo‘yicha taniqli olim, Qishloq xo‘jaligi va oziq-ovqat ta’minoti ilmiy-ishlab chiqarish markazi akademigi, texnika fanlari doktori, professor Abdumutalib Xojiyev 84 yoshida vafot etdi, deya xabar bermoqda Qishloq xo‘jaligi vazirligi.
Uning mexanizatsiya sohasidagi ilmiy ishlanmalari va patentlari mamlakat qishloq xo‘jaligining turli tarmoqlarini rivojlantirish uchun katta ahamiyatga ega bo‘lgan.
Olim qishloq xo‘jaligini mexanizatsiyalash sohasining nazariy va amaliy masalalariga bag‘ishlangan 400 dan ziyod ilmiy maqola, kitob va monografiyalar muallifi.
U 1977-yilda Fan va texnika sohasidagi Abu Rayxon Beruniy nomli davlat mukofoti sovrindori, 1982-yilda “O‘zbekiston Respublikasida xizmat ko‘rsatgan fan arbobi” faxriy unvonini olgan.
Avvalroq Islomshunos olim Ubaydulla Uvatov 80 yoshida, Samarqand davlat pedagogika instituti sobiq rektori G‘anijon Ikromov va O‘zbekistonlik taniqli turkolog Andrey Kubatin vafot etgani haqida xabar berilgandi.
Izoh (0)