«Агар ёрдам беролмасангиз, халақит ҳам қилманг!» – Шерзод Шерматов ҳокимларга мурожаат қилди

Ўзбекистон халқ таълими вазири Шерзод Шерматов Facebook ижтимоий тармоғида мамлакатнинг турли жойларидан ўқитувчиларни сўров ўтказишга жалб қилиш ва аҳолини рўйхатга олиш тўғрисида хабарларнинг скриншотларини жойлаштирди.

«Мамлакатда пандемия мавжуд. Деярли ҳар бир селекторда давлат раҳбари ташкилот раҳбарларини COVID-19 ҳақида огоҳлантиради, ўзларига ва оилаларига ғамхўрлик қилишни қайта-қайта сўрайди. Хўш, Фарғона вилоятидаги 28-мактаб директори ўқитувчи ва мураббийларни маҳаллаларга бориши ва уларнинг вазифаларига умуман тегишли бўлмаган сўровнома ўтказиши тўғри деб ҳисоблаш мумкинми?» – дейилади мурожаатларнинг бирида.

Гап қўллаб-қувватлашга муҳтож одамларни ўз ичига олган «темир», «аёллар» ва «ёшлар» дафтарлари ҳақида кетмоқда.

«Мен Андижонданман. Бунга ким кўрсатма берганини билмайман, лекин уйга бориш, ҳар бир оила аъзосидан маълумотларни тўплаш, уларнинг исм-шарифлари, паспортлари, оилавий аҳволи, турмуш даражаси, иш жойини билиш кимнинг зиммасида? Бундан нима фойда? Бу иш кимнинг зиммасида?», – дейилади бошқа хабарда.

Шерзод Шерматов баъзи маҳаллий амалдорлар ўзларининг ҳозирги муаммосини ҳал қилишга уриниб, «Президент сиёсатига хиёнат қилаётганликларини» тушунмаётганларини билдирди.

«Президент бу йил биринчи бор Ўқитувчи ва мураббийлар кунида ўзи чиқиб табрик сўзи билан мурожаат қилди. Таълим-тарбия тизимини яхшилаш бўйича фармон лойиҳасини тайёрлаш бўйича топшириқ берди, кейин яна қўшимча селектор ўтказиб, ҳар бир ҳоким энди камида 30-40 фоиз вақтини мактабга ёрдам беришга қаратсин деб айтди ва ҳурматли ҳокимларимиздан бу масалага чин дилдан ёндашишни, кундалик топшириқ сифатида қабул қилмасликни сўради. Куни кеча фармонга имзо қўйишдан олдин яна бир бор таълимни кўтариш муҳимлигини қатъий таъкидлади. Бугун эрталабдан эса жойлардан шундай янгиликларни ўқиб турибмиз...», – деди вазир.

Унинг сўзларига кўра, ўқитувчиларни мажбурий меҳнатга жалб қилишнинг бундай ҳолатларига нафақат Президент сиёсатига хиёнат, балки давлат раҳбарини обрўсизлантиришга қаратилган қасддан қилинган уриниш сифатида ҳам қараш керак.

Агар керак бўлса, маҳаллий мансабдор шахслар ҳар бир бундай ҳолат учун жиноий жавобгарликка тортилиши керак, деб ҳисоблайди халқ таълими вазири.

«Ҳурматли ҳокимлар ва сектор раҳбарларидан халқ таълими тизими ходимларини фақат таълим сифати бўйича ишлашларига шароит яратишда ёрдам беришингизни сўраймиз! Ёрдам беришга имкониятингиз бўлмаса, илтимос, жуда бўлмаса халақит қилманг!» – деб ёзади Шерзод Шерматов.

Унинг қўшимча қилишича, бундай қўшимча ишларга Меҳнат вазирлигидаги алоҳида фонддан маблағ олиб жойлардаги ишсизларни жалб қилса бўлади.

Аввалроқ Монополияга қарши курашиш қўмитаси мактабларни жиҳозлашдаги монополияга қарши чиққан эди.