Qashqadaryo viloyatida Qamashi tumani hududida joylashgan o‘rmon xo‘jaligida yong‘in kuzatildi. Viloyat Ekologiya va atrof muhitni muhofaza qilish boshqarmasi axborot xizmati rahbari Karima Yodgorovaning “Daryo”ga ma’lum qilishicha, hodisa 3-noyabr kuni yuz bergan.
5 gektar maydonni qamrab olgan yong‘in oqibatida o‘rmon xo‘jaligi hududidagi noyob daraxtlar, o‘simlik va hayvonot dunyosiga talofat yetgani ta’kidlanmoqda. Xususan, taxminan 600 ga yaqin Zarafshon archasi yonib ketgan. “Ayni paytda zarar miqdori aniqlanmoqda”, -- dedi Karim Yodgorova.
Alohida qayd etishlaricha, yong‘in oqibatida aholi orasida jabrlanganlar yo‘q. Boshqarma yong‘in yuzasidan yaqin vaqt ichida qo‘shimcha axborot berishi kutilmoqda.
Avvalroq, 12-sentabr kuni Surxondaryo viloyati Sherobod tumanidagi “Qiziriq” o‘rmon xo‘jaligida 50 gektar maydonda, 26-iyulda Samarqand viloyatidagi “Zarafshon” tabiat milliy bog‘ida 2 ming kvadrat metr maydonda, 17-iyun kuni Surxondaryodagi “Surxon” davlat qo‘riqxonasida 35 gektar maydonda yong‘inlar kuzatilgani haqida xabar berilgan edi. Qayd etish joiz, “Surxon” qo‘riqxonasidagi yong‘inni o‘chirishga harbiy vertolyotlar ham jalb etilgan edi.
Izoh (0)