АҚШда президент сайловларида овоз бериш якунланди, деб хабар бермоқда Meduza. Энг охирги бўлиб Аляскадаги сайлов участкалари ёпилди, бу Тошкент вақти билан 4 ноябрь 11:00 да юз берди.
Сайловларнинг умумий якуни ҳозирча номаълум, кўпчилик штатларда овозларни ҳисоблаш давом этмоқда. NBC телеканали ҳисоб-китобларига кўра, айни пайтда Байден сайловчилар коллегиясида 209 та, Трамп — 212 та овозга эга.
Трампнинг Техас, Флорида ва Огайода ғолиб бўлгани маълум бўлди, Байден эса Аризонада ғолиб бўлиши кутилмоқда. Қолган «иккиланувчи» штатларда овозлар ҳисобланганича йўқ. Почта орқали овоз берилгани учун баъзи штатларда, хусусан, Пенсильванияда овозларни ҳисоблаш уч кунгача ҳам чўзилиб кетиши мумкин.
Ҳар иккала номзод ҳам ўзининг бўлажак ғалабасига ишонч билдирмоқда.
АҚШ президенти сайловида ғолиб тўғридан-тўғри сайловчилар томонидан эмас, балки сайловчилар коллегияси томонидан аниқланади. Жами сайловчилар 538 киши, ғалаба учун 270 кишининг овози керак. Сайловчилар сони ҳар битта штатда аҳоли сонига мос равишда тақсимланади — энг кўп аҳоли яшайдиган Калифорния штати 55 сайловчига эга. Иккинчи энг йирик штат — Техасда 38 сайловчи, Нью-Йорк ва Флоридада — 29 тадан сайловчи бор. Икки поғонали тизимни ҳисобга олганда, номзод умуммиллий даражада камроқ овоз тўпласа ҳам, муайян штатлардаги ғалабаси ҳисобига сайловда ғолиб бўлиши мумкин.
Изоҳ (0)