ССВ штаби аъзоси коронавируснинг болаларда катталарга нисбатан енгил кечишининг тахминий сабабларини айтди

Коронавирусга қарши кураш штаби аъзоси Барно Абдусаматова коронавирус инфекциясининг болаларда катталарга нисбатан енгил ўтиши сабабларини маълум қилди.

Мутахассис ҳозирги кунда ушбу масала бўйича ягона фикр мавжуд эмаслиги, коронавирус болаларда кўп ҳолларда енгил шаклдаги ЎРВИ сингари томоқ оғриғи, йўтал, бурун оқиши ва аксириш билан кечишини билдирди. Вируснинг оғирроқ шаклида эса тана ҳарорати 37,5-39 даражагача кўтарилиб, ҳолсизлик ва бош оғриғи кузатилади.

Шунингдек, Абдусаматова вируснинг енгил кечиши сабаблари қаторида қуйидагиларни санаб ўтган:

• Катталарга нисбатан соғлом ўпкага эгалиги туфайли болалар касалликнинг оғир шаклларига берилувчан эмас;
• Болалар, айниқса, эрта ёшдаги болалар ёмон одатларга: чекиш ва бошқаларга эга эмаслиги;
• Туғма иммунитет, яъни носпецифик ҳимоя болаларда катталарга нисбатан кучли бўлганлиги;
• COVID-19 вируси ҳужайра ичига кириши учун ўз оқсилини инсон ҳужайраларидаги S рецепторлар билан боғлайди. Болаларда ушбу рецепторларнинг сони ва фаоллиги кам, яъни болаларда вирус кириши учун нишонлар кам;
• Болалар боғча ва мактабларда ўзлари учун жуда кўп янги респиратор инфекцияларга учрайдилар. Бунинг натижасида уларда бир қатор касалликларга қарши антитаналар ҳосил бўлиб, уларнинг миқдори катталарникига нисбатан кўп бўлади.

Лекин шуни ёдда тутиш керакки, болаларда ҳам касаллик ўтказилиб юборилса ва шифокорга кеч мурожаат қилинса ҳамда уларда нафас олиш тизимининг сурункали касалликлари бўлса, уларда ҳам оғир кечиш ҳолатлари кузатилиши мумкин. Ўлимга ҳам олиб келиши мумкин.

Барно Абдусаматова, Коронавирусга қарши кураш штаби аъзоси

Эслатиб ўтамиз, Республика махсус комиссияси ва Коронавирусга қарши кураш штаби аъзоси Нурмат Отабеков АОКА ҳузурида ташкил этилган брифингда Ўзбекистонда ёш болалар орасида коронавирус касаллиги сони кўпайиши натижасида кўплаб болалар вафот этаётгани хусусидаги гаплар ҳақиқатдан йироқлигини билдирган.  Аввалроқ Барно Абдусаматова ҳам Ўзбекистонда шу кунгача коронавирусга чалинганларнинг 3 932 нафари болалар бўлиб, улар орасида ўлим ҳолатлари қайд этилмагани, болалар орасида касаллик 7-18 ёшгача бўлганларда кўп учраётгани, умумий касалланиш кўрсаткичининг 55 фоизини болалар ташкил этишини айтган.  Коронавирус белгилари бор болалар 20 кун, белгисизлар 14 кун давомида юқумли бўлиши ҳақида ҳам тахминлар борлиги маълум қилинган.