O‘zbekiston Davlat bojxona qo‘mitasi “Bojxona chegarasidan olib o‘tilayotgan avtotransport vositalarini bojxona rasmiylashtiruvidan o‘tkazish tartibi to‘g‘risidagi nizomga kiritilayotgan o‘zgartirish va qo‘shimchalar” to‘g‘risidagi qarorni qabul qildi. Bu haqda “Yangi O‘zbekiston” nashri xabar berdi.
Qayd etilishicha, hujjat Prezidentning 2020-yil 5-iyuldagi “Bojxona ma’muriyatchiligini isloh etish va O‘zbekiston Respublikasi davlat bojxona xizmati organlari faoliyatini takomillashtirish to‘g‘risida”gi farmoniga muvofiq qabul qilingan.
Nizomning 7-bandiga kiritilgan o‘zgartirishga ko‘ra, avtotransport vositasini qaytarib olib chiqishda majburiyatnoma tuziladi, u “Avto” yagona avtomatlashtirilgan axborot tizimi orqali kirish bojxona posti xodimi tomonidan davlat, rus va ingliz tillaridan birida chop etiladi hamda xorijiy avtotransport vositasining egasiga beriladi.
Nizomga kiritilgan 121-bandga ko‘ra, vaqtincha olib kirish muddati tugashidan oldin O‘zbekiston Respublikasi hududidan chiqib ketayotgan haydovchi bojxona organiga avtotransport vositasini vaqtincha saqlash uchun yozma yoki elektron tarzda murojaat qilgan taqdirda, ushbu avtotransport vositasi bojxona organi tomonidan belgilanadigan joylarda vaqtincha saqlash davri uchun 16-bandda ko‘rsatilgan yig‘im to‘lanmaydi, bundan avtotransport vositasini saqlash bilan bog‘liq xarajatlar mustasno hisoblanadi.
Nizomning 17-bandi yangi tahririga ko‘ra, vaqtincha olib kirish muddati tugashidan oldin ushbu muddatni uzaytirish uchun xorijiy avtotransport vositasining egasi belgilangan muddat tugashidan avval xorijiy avtotransport vositasi turgan joydagi bojxona postiga muddatni uzaytirishni so‘rab yoki elektron tarzda masofadan to‘lovlarni amalga oshirgan holda real vaqt rejimida murojaat qilishi zarur. Murojaatga 16-bandda nazarda tutilgan yig‘im to‘langanligini tasdiqlovchi hujjat nusxasini ilova qilish lozim. Tegishli bojxona posti muddatni yig‘im qancha muddat uchun to‘langan bo‘lsa, shuncha muddatga uzaytiradi va “Avto” tizimida uning muddati uzaytirilganligi to‘g‘risidagi axborotni kiritadi.
Hujjat Qonun hujjatlari ma’lumotlari milliy bazasida e’lon qilingan va 2021-yil 26-yanvardan kuchga kiradi.
Izoh (0)