Toshkent viloyatida 200 quti “Remdesivir” dorisini jami 170 millionga sotgan shaxs qo‘lga olindi

Toshkent viloyatida 200 quti “Remdesivir” dorisining har birini 850 mingdan sotgan shaxs ushlandi, deya xabar bermoqda Bosh prokuratura “Daryo”ga.

Ma’lum qilinishicha, Bosh prokuratura huzuridagi Departament va Davlat bojxona qo‘mitasining Toshkent viloyati boshqarmalari tomonidan tezkor tadbir o‘tkazilgan.

Tadbir davomida fuqaro J.A. tomonidan pandemiya sharoitida mo‘may daromad orttirish maqsadida koronavirus infeksiyasini davolashda foydalaniladigan “Remdesivir for Injection” nomli dori vositasini dorixona va uning filialidan tashqarida har bir qutisini 850 ming so‘mdan hisoblab, 200 qutini jami 170 million so‘mga sotgan vaqtida ushlangan.

Tergovga qadar tekshiruvda J.A. “Remdesivir for Injection” dorilarini qayta sotish maqsadida fuqaro M.K.dan xarid qilganligi aniqlangan.

Mazkur holat yuzasidan J.A. va M.K.ga nisbatan Jinoyat kodeksining 186-moddasi 3-qismi “a” bandi (juda ko‘p miqdorda dori vositalarini yoki tibbiy buyumlarni dorixonalardan va ularning filiallaridan tashqarida realizatsiya qilish) bilan jinoyat ishi qo‘zg‘atilib, tergov harakatlari o‘tkazilmoqda.

Eslatib o‘tamiz, “Remdesivir” Yevropa Ittifoqida ruxsat olish uchun tavsiya qilingan koronavirusga qarshi ilk dori vositasi hisoblanadi. Janubiy Koreya ham 1-iyuldan boshlab mazkur dori vositasini sotib olishni boshlagandi. O‘zbekistonda ham profilaktika, kasallikning yuqishining oldini olish maqsadida ishlatish mumkin bo‘lgan dorilar qatorida “Remdesivir” bor. JSST uni koronavirusga qarshi kurashda “umid uyg‘otuvchi” dori vositasi deb atagan. Preparat koronavirus ko‘payishini bloklash xususiyatiga ega ekanligi kanadalik olimlar tomonidan aprel oyida aniqlangandi. AQSh “Remdesivir” preparatining deyarli barcha zaxirasini sotib olayotganini ma’lum qilgandi.

AQSh prezidenti Donald Tramp ham koronavirusdan “Remdesivir” dorisi orqali davolangan. Amerika prezidentini davolovchi shifokor Shon Konlining ma’lum qilishicha, Trampning organizmida kislorod darajasi 93 foizgacha tushib ketganidan so‘ng deksametazon qo‘llanilgan. Shifokorlar steroidni 3-oktabr kuni “Remdesivir” preparatining ikkinchi dozasi bilan birga qo‘llashni boshlagan, Trampda ikkilamchi ta’sirlar aniqlanmagan.

Avvalroq Toshkent shahrida 60 quti “Remdesivir” dorisini 60 million so‘mga sotayotgan shaxslar qo‘lga olingani xabar qilingandi.