Ўзбекистон Давлат божхона қўмитаси «Божхона чегарасидан олиб ўтилаётган автотранспорт воситаларини божхона расмийлаштирувидан ўтказиш тартиби тўғрисидаги низомга киритилаётган ўзгартириш ва қўшимчалар» тўғрисидаги қарорни қабул қилди. Бу ҳақда «Янги Ўзбекистон» нашри хабар берди.
Қайд этилишича, ҳужжат Президентнинг 2020 йил 5 июлдаги «Божхона маъмуриятчилигини ислоҳ этиш ва Ўзбекистон Республикаси давлат божхона хизмати органлари фаолиятини такомиллаштириш тўғрисида»ги фармонига мувофиқ қабул қилинган.
Низомнинг 7-бандига киритилган ўзгартиришга кўра, автотранспорт воситасини қайтариб олиб чиқишда мажбуриятнома тузилади, у «Авто» ягона автоматлаштирилган ахборот тизими орқали кириш божхона пости ходими томонидан давлат, рус ва инглиз тилларидан бирида чоп этилади ҳамда хорижий автотранспорт воситасининг эгасига берилади.
Низомга киритилган 121-бандга кўра, вақтинча олиб кириш муддати тугашидан олдин Ўзбекистон Республикаси ҳудудидан чиқиб кетаётган ҳайдовчи божхона органига автотранспорт воситасини вақтинча сақлаш учун ёзма ёки электрон тарзда мурожаат қилган тақдирда, ушбу автотранспорт воситаси божхона органи томонидан белгиланадиган жойларда вақтинча сақлаш даври учун 16-бандда кўрсатилган йиғим тўланмайди, бундан автотранспорт воситасини сақлаш билан боғлиқ харажатлар мустасно ҳисобланади.
Низомнинг 17-банди янги таҳририга кўра, вақтинча олиб кириш муддати тугашидан олдин ушбу муддатни узайтириш учун хорижий автотранспорт воситасининг эгаси белгиланган муддат тугашидан аввал хорижий автотранспорт воситаси турган жойдаги божхона постига муддатни узайтиришни сўраб ёки электрон тарзда масофадан тўловларни амалга оширган ҳолда реал вақт режимида мурожаат қилиши зарур. Мурожаатга 16-бандда назарда тутилган йиғим тўланганлигини тасдиқловчи ҳужжат нусхасини илова қилиш лозим. Тегишли божхона пости муддатни йиғим қанча муддат учун тўланган бўлса, шунча муддатга узайтиради ва «Авто» тизимида унинг муддати узайтирилганлиги тўғрисидаги ахборотни киритади.
Ҳужжат Қонун ҳужжатлари маълумотлари миллий базасида эълон қилинган ва 2021 йил 26 январдан кучга киради.
Изоҳ (0)