O‘zbekiston Respublikasi Korrupsiyaga qarshi kurashish agentligi direktoriga ikki nafar o‘rinbosar tayinlandi. Bu haqda agentlik tomonidan xabar berildi.
Agentlikning ma’lum qilishicha, O‘zbekiston Prezidentining 3-noyabrdagi qarori bilan Umida To‘xtasheva Korrupsiyaga qarshi kurashish agentligi direktori o‘rinbosari — Jamoatchilik bilan aloqalar, murojaatlar bilan ishlash va xalqaro hamkorlik boshqarmasi boshlig‘i etib tayinlandi.
Umida To‘xtasheva 1978-yilda tug‘ilgan. U 2003-yilda Toshkent davlat yuridik institutini tamomlagan. Tayinlovga qadar Umida To‘xtasheva Toshkent davlat yuridik universitetining Jinoiy odil sudlov fakulteti dekani lavozimida faoliyat yuritgan.
Prezident qaroriga asosan Tal’atjon Haydarov Korrupsiyaga qarshi kurashish agentligi direktorining o‘rinbosari — Korrupsiyaga qarshi kurashish tizimini tahlil va monitoring qilish boshqarmasi boshlig‘i etib tayinlandi.
Tal’atjon Haydarov 1980-yilda tug‘ilgan. U 2001-yilda Toshkent davlat yuridik institutini tamomlagan. Tal’atjon Haydarov tayinlovga qadar Korrupsiyaga qarshi kurashish agentligining ichki xavfsizlikni ta’minlash bo‘limi boshlig‘i lavozimida faoliyat yuritgan.
Eslatib o‘tamiz, Shavkat Mirziyoyev 2020-yil 24-yanvarda Oliy Majlisga yo‘llagan murojaatnomada korrupsiyaning oqibatlari bilan kurashishdan ko‘ra barvaqt oldini olishga o‘tish kerakligini ta’kidlab, unga qarshi kurashishga mas’ul bo‘ladigan alohida organ tuzishni taklif qilgan edi. Iyun oxiriga kelib mamlakatda Korrupsiyaga qarshi kurashish agentligi tashkil etildi va unga Akmal Burhonov direktor etib tayinlangandi.
Izoh (0)