Ўзбекистон Республикаси Коррупцияга қарши курашиш агентлиги директорига икки нафар ўринбосар тайинланди. Бу ҳақда агентлик томонидан хабар берилди.
Агентликнинг маълум қилишича, Ўзбекистон Президентининг 3 ноябрдаги қарори билан Умида Тўхташева Коррупцияга қарши курашиш агентлиги директори ўринбосари — Жамоатчилик билан алоқалар, мурожаатлар билан ишлаш ва халқаро ҳамкорлик бошқармаси бошлиғи этиб тайинланди.
Умида Тўхташева 1978 йилда туғилган. У 2003 йилда Тошкент давлат юридик институтини тамомлаган. Тайинловга қадар Умида Тўхташева Тошкент давлат юридик университетининг Жиноий одил судлов факультети декани лавозимида фаолият юритган.
Президент қарорига асосан Талъатжон Ҳайдаров Коррупцияга қарши курашиш агентлиги директорининг ўринбосари — Коррупцияга қарши курашиш тизимини таҳлил ва мониторинг қилиш бошқармаси бошлиғи этиб тайинланди.
Талъатжон Ҳайдаров 1980 йилда туғилган. У 2001 йилда Тошкент давлат юридик институтини тамомлаган. Талъатжон Ҳайдаров тайинловга қадар Коррупцияга қарши курашиш агентлигининг ички хавфсизликни таъминлаш бўлими бошлиғи лавозимида фаолият юритган.
Эслатиб ўтамиз, Шавкат Мирзиёев 2020 йил 24 январда Олий Мажлисга йўллаган мурожаатномада коррупциянинг оқибатлари билан курашишдан кўра барвақт олдини олишга ўтиш кераклигини таъкидлаб, унга қарши курашишга масъул бўладиган алоҳида орган тузишни таклиф қилган эди. Июнь охирига келиб мамлакатда Коррупцияга қарши курашиш агентлиги ташкил этилди ва унга Акмал Бурҳонов директор этиб тайинланганди.
Изоҳ (0)