Top Gear ko‘rsatuvida paydo bo‘lgan “Mister Nippi” laqabli muzqaymoq furgoni Ginnesning rekordlar kitobidan joy oldi: mashinani poyga yo‘lagida soatiga 128,82 kilometr tezlikda haydashga erishilgan. Bu kabi natija bilan “Mister Nippi” o‘z klassidagi eng tezkor mashinaga aylandi, deb xabar beradi Motor.
Bundan oldingi rekord soatiga 118,9 kilometr tezlikni tashkil etgan. U britaniyalik muhandis Edd Chayn va uning qo‘lbola muzqaymoq furgoniga tegishli. Yangi rekordni esa Peddi Makginness o‘zining 1979-yilda ishlab chiqarilgan va Land Rover 110 shassisi hamda Tesla dvigateli o‘rnatilgan Bedford CF mashinasida o‘rnatdi.
Tezlikka oid rekordlar odatda buning uchun mo‘ljallanmagan noodatiy transport vositalarida o‘rnatiladi. Masalan, 2019-yilda Honda Mean Mower V2 gazon qirqqichi soatiga 100 kilometr tezlikka 6,29 soniyada erishib, Ginnesning rekordlar kitobidan joy olgandi.
Shu yilning avgustida esa britaniyalik mototsiklchi oyoqlarini oldinga uzatib, orqa g‘ildirakda harakatlanish bo‘yicha rekord o‘rnatgandi.
Izoh (0)