Top Gear кўрсатувида пайдо бўлган «Мистер Ниппи» лақабли музқаймоқ фургони Гиннеснинг рекордлар китобидан жой олди: машинани пойга йўлагида соатига 128,82 километр тезликда ҳайдашга эришилган. Бу каби натижа билан «Мистер Ниппи» ўз классидаги энг тезкор машинага айланди, деб хабар беради Motor.
Бундан олдинги рекорд соатига 118,9 километр тезликни ташкил этган. У британиялик муҳандис Эдд Чайн ва унинг қўлбола музқаймоқ фургонига тегишли. Янги рекордни эса Педди Макгиннесс ўзининг 1979 йилда ишлаб чиқарилган ва Land Rover 110 шассиси ҳамда Tesla двигатели ўрнатилган Bedford CF машинасида ўрнатди.
Тезликка оид рекордлар одатда бунинг учун мўлжалланмаган ноодатий транспорт воситаларида ўрнатилади. Масалан, 2019 йилда Honda Меан Mower V2 газон қирққичи соатига 100 километр тезликка 6,29 сонияда эришиб, Гиннеснинг рекордлар китобидан жой олганди.
Шу йилнинг августида эса британиялик мотоциклчи оёқларини олдинга узатиб, орқа ғилдиракда ҳаракатланиш бўйича рекорд ўрнатганди.
Изоҳ (0)